Renungan Minggu Jubilate, Pdt Robin Butarbutar: Manontong do Asi ni Roha Na (Psalmen 100:1-5)

Ginurithon ni Pdt. Dr. Robinson Butarbutar

"Marolopolop tu Debata ma ale sandok tanoon (Psalmen 66: 1)"

GREENBERITA.com- Hamu angka dongan.,

Tung mansai uli jala mampanghorhon na denggan do di ngolunta angka na porsea di Debata Sitolusada i na di bagasan sada taon parhuriaon adong sada Minggu na digoari Minggu Jubilate, Minggu Olopolop, i ma sada Minggu na manjouhon tu hita asa rade mangolophon Jahowa, ndang holan ala tongon marlas ni roha hita, marhangoluan na tarpasupasu, ndang hurangan jala digohi las ni roha ngolunta, alai dohot do molo tung pe jala tarlumobi molo tongon adong manang bahat parungkilon ni ngolu naung tabolus jala na tongon taadopi, asa unang marhangoluan na talu tu parungkilon dohot tantangan i ngolunta on, alai ngolu na tau mangadopi parungkilon dohot tantangan i ala di bagasan rohanta adong hagogoon na so tartuhor, adong hagogoon na so tarlehon ni manang ise, i ma roha na marolopolop, roha na mar las ni roha.

I do na naung dipatuduhon angka na porsea i di sandok portibion dohot di ganup partingkian, i ma tarbahen na porsea na marolopolop, roha na mangolophon Jahowa do mangadopi angka tantangan ni ngolu na targoar so taradopan ni ngolu ni jolma i sian dirina sandiri.

Laho mangurupi hita marhangoluan na tuk mangolophon Jahowa di ngolunta, dienet ma jamita di hita sian sada Psalmen na targoar Psalmen Olopolop, na isi-na ndang holan manjouhon asa sandok tano on olo, sigop, ringgas, hiras jala hinsa mangolophon Jahowa marhitehite las ni roha, di partondion/rohanta dohot marhite na ro masuk dohot di na masuk tu bagas joroNa jala habangsa parasianNa marhitehite ende pujipujian mardongan roha mauliate tu Ibana, alai dohot do marhite na manggoari jala manjouhon tu hita asa olo manggoari sian nasa rohanta dia sialana umbahen tama taolophon Jahowa. 

Adong manang piga na digoari sialana, i ma Parjolo, Jahowa do Debata; Paduahon, Jahowa na jumadihon hita, Patoluhon, Jahowa nampuna hita, birubiru pinarmahananNa; Palimahon, pardenggan basa do Jahowa, jala Paonomhon, ro di saleleng ni lelengna do asi ni roha Heber: khesed)-Na, huhut tahe, parpudi, marsundutsundut do hasintonganNa. 

Dohot hata na jempek: olophonon do Jahowa ala Debata na jumadihon jala na marnampunahon, marmahani dohot pardenggan basa tu hita, jala parasiroha roha salelenglelengna do Jahowa.

Na ringkot halashonon, olophononta di Minggu Jubilateon, hamu angka dongan i ma pitunsa. Alai ndang apala ganup na pitu i na ringkot di minggu Jubilate on dijouhon tu hita na gabe jamita. Sada sian i do, i ma: Olophononta ma Jahowa siala ro di saleleng ni lelengna do asi ni rohaNa. I do umbahen na ditogihon hita tu topik ni Jamita songon on di minggu Jubilatenta on: Manontong do asi ni rohaNa (Heber: leolam khasdu). 

Marojahan sian hata na dipangke di ayat 5 i do haputusan mambahen i gabe topik ni jamitanta. Disi dipangke hata on di hata Heber: ki, siala, ala. Adong tolu na digoari di ayat 5 i ihut ni hata ki i, i ma: Pardenggan basa do (Heber: tov), ro di salelengna/manongtong asi ni rohana, khesed-Na, jala marsundutsundut hasintonganNa. Tolunsa ndang tarsirang nian: Marojahan tu hasintonganNa do Debata patupa na denggan dohot palumehon asi ni rohaNa tu hita. 

Alai sada sian na tolu i do na dienet gabe jamita di hita, i ma sialana boasa hita di minggu Jubilate on dijouhon asa marolopolop. I do antong, ai jamita evangelium do jamitanta, jamita na mamaritahon las ni roha, jamita na mangalehon ojahan tu joujou asa marolopolop.

Hamu angka dongan, i do tutu impola ni barita las ni roha, euanggelion, di Hakristenon: Asi ni roha (Khesed) ni Jahowa, jala asi ni rohaNa i ndang dipangan tingki, ndang dibatasi tingki, alai manontong, leolam, ro di salelengnilelengna. 

Holan asi ni rohaNa tu hita pe tapingkirpingkiri, nunga tama hita mangolophon Jahowa marhite ende nang pambahenan ni ngolunta. Ba lam ma asi ni roha na manongtong-Na, nda tung so suan, tubu, martumbur, jala magodang olopolopta tu Ibana, Jahowa parasi roha na manongtong i. 

Hamu angka dongan, denggan do tapatangkas, dia do na targoar khesed, asi ni roha ni Jahowa i, asa taronjar hita tutu situtu di ngolunta mangolophon Jahowa. Mangihuthon angka naung mangalapati hata khesed i, asi ni roha i, ia hata khesed i di hata Gorik dilapati “agave”, i ma holong ni roha ni Debata na so mansohot tu hajolmaon, na so bersyarat, na di bagasanna adong habaranion dohot hatimboon ni pingkiran nang sihol ni roha (Jaha: imajinasi) ni Jahowa patupasa tu hajolmaon. 

Hata khesed i mansai jotjot dipangke ndang holan sama jolma, alai tarlumobi sian Debata maradophon hajolmaon. Pola 246 hali dipangke hata i di Padan Narobi.

Ala ni i, tardok mansai bidang do na hinangkam ni hata khesed i, i ma ndang holan pambahenan ni Debata tu hajolmaon boti, ndang holan na marhadomuan tu na ringkot di ngolu pardagingon ni hajolmaon i, alai dohot do tu na umbagas sian i, i ma asi ni rohaNa maradophon hajolmaon na so apala tuk palas roha ni Debata na manghaholongi DebataNa i. Diasii roha ni Debata jolma i nang pe mansai bahat hagaleon ni hajolmaon i sial

a marpamatang na so torus marhagogoon jolma i, alai di pamatangna i bahat do hagaleonna, jala bahat keterbatasanna, na mura matapar do pamatangna, jala na rentan tu angka na so taradopisa sian dirina sandiri/maradophon angka na ro sian duru ni diriNa, nang na ro sian dirina sandiri. Diasii Debata do hita on. 

Naumbagas tarida asi ni rohaNa i di ulaonNa di bagasan diri ni anakNa na sasada i do, na ditongos Ibana, jala na umbagas dope, di bagasan na Ibana sandiri manjadi hadirion ni jolma na marpamatang i, i ma Jesus Kristus i, dihaholongi Ibana jolma i, i ma manobus jolma i sian dosana, pasidungkon hamatean salelengna i, gariada ro anakNa i laho mamboan ngolu na sasingkopsingkopna tu na porsea di Ibana (Joh. 10:10). 

I ma lapatan ni hata khesed, agave, asi ni roha i. Alai sadanari na mansai bagas na gabe sialana umbahen mansai ringkot taolophon, taendehon Jahowa, i ma ala khesed-Na i leolam, salelenglelengna, manongtong do tu hita angka na jinadihon, pinarpunnahon, dohot pinarmahanNa asi ni rohaNa i, ndang talu tu tingki, ndang talu tu rumang ni ngolungolu nang partingkian ni ngolungolunta. 

Luar biasa, dao sian hatauon ni jolma marasi ni roha maradophon angka donganna jolma.

Boasa ma mansai ringkot on manogihon hita di minggu Jubilate di bagasan taon on? Bahat do na boi goaronta songon hajolmaon dohot songon huria ni Kristus nang marsasahalak gabe rumang ni sialana dalanta mangolophon Ibana. 

Naparjolo, na boi goaron i ma, asi ni rohaNa tu hajolmaon na patau hajolmaon marhite hapistaran dohot habisuhon mangadopi dohot pasisi Covid-19 i, na pola sanga songon i leleng patupa biar na sun jorbut tu hita jolma, ndang marimbar hita di Indonesia, ndang marimbar hita ruas ni HKBP. 

Sanga do tarimpu suda ma hajolmaon on panganon manang bonduton, lengsehonon ni virus i. Alai ala ro di saleleng ni lelengna do asi ni rohaNa tu hita dipalua do hita sian hamatean massal panghorhon ni Covid-19 i. 

Napaduahon, na boi goaronta songon huria, HKBP, na pinarpunahonNa dohot na pinarmahanNa i, sanga do hita maila songon huria na balga siala ndang tarbahen hita manggohi tanggung jawabta tu angka pangula na gok ni hurianta dung suda gogonasida. Godang ni Rp.144,7 Miliar utangta songon huria tu nasida. 

Alai dipalua Debata do hita di ujung ni Desember 2022 i marhite na dipanghulingi TondiNa jala dionjar holongNa i hita na di bagasan dohot na di duru ni HKBP pasahathon peleanta tu Ibana, i ma na tapangke manggarar utangta i tu nasida. Nunga tagarar tu naung pensiun Rp97 Miliar sekaligus, jala nunga tapamasuk tu DPLK AIA godangna Rp87,9 Miliar tu angka peserta Dana Pensiun na so pensiun dope di ujung ni Desember i. 

Napatoluhon, nang songon huria, dung tasangkapi di HKBP marhite sinode Godangta taon 1970 asa taeahi Sentralisasi Parhepengon di HKBP anggiat boi hita mangulahon ulaon pinasahat ni Tuhanta Jesus tu HKBP padenggandengganna, dumenggan sian na so marsentralisasi, tarlumobi asa boi tahobasi ruas ni HKBP na so dung dope saleleng on dapotan panghobasion manang nunur dihobasi angka partohonan gok tingki atik pe ndang apala togu parhepengon nasida, dipatau Debata do hita di Sinode Godang pa-66-hon manotophon jala mamungka 1 Januari 2023 i padalanhon Sentralisasi Parhepengon. 

Dipangke Debata angka ruasna songon Ir. Sukur Nababan dohot angka donganna uluan dohot ruas Tim Kaji Sentralisasi Parhepengon nang St. Ir. Albert Simanjuntak MBA dohot St. Marangkup Manik songon i nang Ir. Elisa Lumbantoruan dohot angka dongannasida ruas ni Tim Sinkronoisasi dohot Pembantu BPSK, songon i nang uluan nang ruas Komissioner ni Badan Pengelola Sentralisasi Keuangan pinabangkit ni Ephorus marojahan tu haputusan ni rapot Praeses dohot rapot MPSta, laho pasauthon i. Gabe boi ma marbalanjo na denggan sude personel ni HKBP na 3.601 halak i na mangula di sandok HKBP mamungka 1 Januari 2023 i, gabe digohi las ni roha jala hibul roha nasida mangula sadenggandengganna, manghobasi hita ruas ni pamatang ni Kristus i, na marsaor di HKBP, asa tarhobasi jala tarpasupasu sude ruas ni HKBP. 

Dung lam denggan annon tuk ni hepengta di BPSK na marharoroan sian denggan ni peleanta tu Debata, nunga boi tumibu nian sarihonon ni BPSK na ringkot tu operasional nang program resort, distrik, nang hatopan ni HKBP. Lam tatanda asi ni roha ni Debata tu hita, lam denggan do annon godang ni na taharingkothon di pardalan ni Sentralisasi Parhepengon i di HKBP. Nuaeng on ganup ruas nunga marpelean tu Debata asa boi marhite peleanna i parsidohot ibana di ulaon ni Tuhanta di ganup huria di HKBP na adong di angka ingangan asing ni ingananna sandiri, dohot nang ibana manghobasi ruas na so di huriana marhite angka parhobas na tatongos tusi. 

Jala boi ganup partohonan manarihon marhite panghobasionna na denggan di ingangan ulaonna manarihon angka donganna partohonan gok tingki na adong di angka inganan na asing, dohot ma di angka ingangan na soding, na suhi, na pogos, dohot ma di angka ingangan nang inganan ni hajolmaon na so tardungdung barita nauli ni Tuhanta Jesus dope nasailaon i. Sudena i ala ni asi ni rohaNa na manongtong i do tu hita, jala boi Ibana mangula marhite hita. Boi hita dipangke gabe ulaulaNa manarihon na asing, so ala ni gogonta, alai tong ma ala ni asi ni rohaNa tu ngolunta marsadasada.

Napaopathon, di ngolunta siganup ari di ruas ni HKBP, asing ni haluaon na manongtong naung pinalumehon ni Debata tu hita ruas dohot partohonan ni HKBP marsadasada, i ma dapotan haluaon na manongtong hita sian dosa dohot hamatean binahen ni hamamate nang haheheon ni Jesus Kristus songon haheheon buhabaju ni haheheonta sogot, di portibion ro di saleleng ni lelengna do, na so marnamontok do, asi ni roha ni Debata tu hita ruas nang partohonan ni HKBP. 

Atik pe otik do toropta, alai dipasupasu Debata do hita di ngolu nang ulaonta. Ndang adong hita na mate anturaparon dohot uasan, ai dipasupasu Debata do ganup na denggan na taula. 

Napalimahon, disura sandok bangso di portibion do na mansai maol do ngolungolu ekonomi adopan ni angka bangso di portibion mamungka taon 2023 on, panghorhon ni na so marnamansohot dope porang ni Rusia maradophon Ukraina. Alai hita di Indonesia tardok taradopi hita dope na masa i, atik pe bahat do sian tongatonganta na tong marungkil situtu di parngoluanta siala ni haaolon ni ekonomi i.

Napaonomhon, di hita angka ruas ni HKBP taida do asi ni roha ni Debata di ujung ni taon akademi di bulan April on, ai bahat do angka anak dohot borunta na boi masuk tu angka sikkola/pendidikan na timbo di negeri di Indonesia on, atik pe mansai borat do kompetisi mandundung ingangan universitas negeri. Jala tu angka ianakkonta na so masuk tusi, dipatau Debata do angka natoras pasikkolahon ianakkonnasida tu angka perguruan tinggi swasta na denggan, asa boi gabe tenaga kerja na denggan ganup ruas ni hurianta. 

Jala, tu angka ruasta na so tuk marsikkola na timbo, dipatau Debata do tong hita mangalului dalan dalan ni ngolu na so maralo tu lomo ni rohaNa. Jala boi dope tambahononta bahat siala boasa ingkon olophononta Debata, i ma angka na so tardodo jala hagoaran ahu.

Ala ni i, hamu angka dongan, denggan ma tajanghon joujou ni parPsalmen tu hita di minggu Jubilate on, Taolophon, taendehon, tapuji ma Debata Jahowa Sitolusadai, ala ro di saleleng ni lelengna/manongtong do asi ni rohaNa tu hita angka na pinarpunahonNa dohot angka na pinarmahanNa. Masuhi ma ganup ari habangsa parasianNa i mangolophon dohot mamujimuji goarNa. Amen.

(Penulis saat ini melayani sebagai pucuk pimpinan HKBP Pearaja di Tarutung, Sumatera Utara)