Oleh Pdt. Dr. Robinson Butarbutar
Hamu angka Dongan sahaporseaon, di minggu Advent Patoluhon sadarion, ditogihon, disosoi jala dijou Debata hita marhite hataNa na tarsurat di Jesaya 12:1-6 i asa di na manomunomu Tuhan i di haroroNa paduahalihon asa 'Marolopolop.'
Adong manang piga ojahan dihatahon panurirang Jesaya sihalashononta nuaeng on, ojahanta marolopolop nuaeng on nang di ariari na ro di ngolunta.
Hata ni Debata pinasahatna najolo tu dirina sandiri alai dohot ma marhite hata 'ahu' na tongon mangadopi parungkilon bolon mansai ampit nang tu hita angka anak dohot boruNa na manghaporseai Ibana alai na tongon mangadopi marragam hamaolon ni ngolu jala mangihuthon angka pande bisuk ekonomi naeng mangadopi angka resesi ekonomi nang krisis pangan panghorhohon ni porang ni Rusia tu Ukraina, nang siala ni pandemi Covid-19 na so marnasohot dope harararatna nang panghorhonna na so dengganna tu ngolu ni hajolmaon.
Parjolo, i ma ala nunga marpamuati rimasNa mida hita ganup, jala nunga diapuli hita/ahu. On ma na dipatupa Debata tu bangsoNa halak Israel na mardosa dompak Debata, marhite na manomba Debata.
On do tong naung dipatupa Debata Ama marhite panobusion ni AnakNa Tuhan Jesus Kristus tu hita angka na manghaporseai hadirion dohot ulaonNa. Nunga angka naung tinobusNa hita mansai arga marhite hamamate ni anakNa i di hau pinorsilang i.
Nunga gabe angka anak dohot boruNa na pinarbadiaanNa hita marhite pandidion nabadia i. Huhut tahe, nunga diapuli Debata hita di na taingot panghorhon ni dokdok na sanga taadopi uju dirimasi Debata hita uju pardosa. Di na mangarade hita marpesta di ari hatutubu ni Tuhanta Jesus i, mansai ringkot hita manomusa marhite na marolopolop ala i do ia na tinuju ni hatutubu ni Jesus Sipalua i, i ma laho manesa dosa ni ganup na porsea di Ibana dohot di ulaonNa manobus pardosa i.
Ndang holan i tahe, dipajongjong Tondi ni Debata do punguan ni angka na porsea di hadirion dohot ulaon panobusion ni Jesus i huria, na di bagasanNa dipatupa Debata ulaon Sakramen Pandidion na Badia, dohot Ulaon na Badia na di bagasanNa didok Debata tu ganup na mandohotisa naung sesa dosana.
Di bagasan huria i do tong dihobasi Debata angka naung tinobusNa i marhite ulaon parmingguon na di bagasanna dipatupa ulaon manopoti dosa jala tu na manopotisa di bagabagahon hasesaan ni dosa. Gariada tahe, ala pamatangta on na mura matapar do, dipatupa do di huria i ulaon parmahanion dohot paminsangion tu angka ruasna na mardosa, asa hot ibana mian di bagasan hadirion naung tartobus/tersesa dosana, jala pinarbadiaan ni Debata sahat ro di hamamate ni ngoluna di portibion jala niramotanNa sahat ro di hangoluan sogot.
I do ojahan ni olopolopta songon na pinatolhas ni panurirang Jesaya di Jesaya 12: 1 i.
Paduahon, Tuhan Debata i nunga gabe jala tongtong manjadi hatuaonku, Ibana Hagogoonta dohot pujipujianta, ala ni ndang jadi mabiar hita. Mansai bagas do na tadok marhite hata Debata do hatuanta jala Ibana manjadi hatuaon di hita.
Hatuaon di hata Indoensia dilapati: Keselamatan.
Domu tu partingkian do hinabagasna. Dohot hata 'Debata do hatuaonta,' i ma nunga dipalua Debata hita, nunga taida hatuaon/KeselamatanNya di tingki na salpu. Dohot hata 'manjadi hatuaonta' marlapatan Debata do tong na tongon hatuaonta/paluahon hita, jala di tingki na ro pe na so taboto dope songon dia rumang ni siadopan di ngolunta Debata do palua hita/hatuaonta disi. Lumobi tahe, Debata do mual ni hatuaonta/sumber keselamatan kita.
Hatuaon/keselamatan nataongku i ma hatuaon na so dipapejek pangantusionna, alai hatuaon na hibul do (Patudos tu hata ni Jesus Kristus na mangihut on di Joh 10:10 na patorangkon dia do tinuju ni harorona songon Parmahan:
"Alai anggo Ahu, asa adong hangoluan di nasida, pola marlobilobi di nasida umbahen na ro.".
Hatuaon i ndang holan di partondion, i ma haluaon sian dosa, alai dohot do haluaon sian angka na manusai ngolu ni jolma di portibion. Di ngolunta siganup ari di portibion, di na mangadopi angka na maol hita mangalului na ringkot tu ngolunta siganup ari, tu sintasintanta, di ulaonta, di angka usahanta, Ibana do hatuaonta.
Haporseaonta di Jesus Kristus hatuaonta di tingki na salpu, nuaeng, nang sogot pe i do na pinatolhas ni panurirang Jesus di Jesaya 12:2-3 i.
Asa, ndang jadi hita mabiar. Debata do hagogoon dohot pujipujianta.
Patoluhon, marolopolop do/ma hita nuaeng, jala marolopolop do tong hita di ari ni Tuhan i, mamuji goar ni Debata sipabotohonon jala sijamitahonon, ai nunga dijadihon Ibana halongangan (Jesaya 12: 4-6). Ala ni i, hamu angka dongan, ingkon sungkunonta do boasa ma ingkon di Adven III-hon on dijouhon Debata tu hita asa marolopolop ma hita di bagasan ngolunta manomunomu Tuhan i? Atik na pa bahathu do na mambahen hita ndang tuk marolopolop.
Suraon do siala patimbohu tabahen sidungdungonta i di ngolu on, isara parnampunaon na so mar na tuk, gabe ndang tarbahen hita marnida nunga, naung gabe, jala gabe hatuaonta/keselamatan kita do Tuhanta i?
Sotung na pabahathu nuaeng nataarsakhon, gabe meret hita sian hadirion na hiras, hadirion na hinsa, hadirion na marbisuk (jaha: kreatif, inovatif) tu na gabe hadirion na pargudompong, na losok, na na marnatudia, gabe marjolma na gabe porsea di pangantusion di sibaran di hita halak Batak najolo, ndang be gabe halak Kristen Batak na petarung, na kreatif, na so ditaluhon tantangan, gabe na sai talu tu jala manura didi ndang tau mangadopi tantangan.
Gabe sundut/generasi pangandung ma hita, ndang be gabe sundut/generasi nang jolma na molo tung ingkon tangis, unang ma gabe partangis di ngolu on.
Siala ni i ndang adong be sian ruas ni keluarganta na petarung, na sukses. Alai gabe bahat na menyerah, mambuat jalan pintas.
Mansai las rohangku manjaha di Toilet ni Airport Pekanbaru hata na mangihut on:
"The escalator is currently out of order. You have to use the staircases for success."
Sotung do siala tutu di tingki on mansai bahat do na taadopi di keluarganta be, domu tu kondisi ngolungolu ekonomi di portibion, gabe ingkon dijouhon Debata tu hita asa marolopolop, jala ojahan olopolopta i ala boti: Gari Debata nunga marpamuati rohaNa mida hita, jala Debata do naung, na tongon, na naeng paluahon hita.
Ibana, Debata na Tumimbul i do Mual ni Hatuaonta.
Ianggo angka na maol na taadopi i lomo situtu do rohana asa bonom hita, manadingkon na tongon taadopi i. Alai hata ni Debata mandok tu hita unang taoloi. Ai Debata do hatuaonta, Debata do hagogoonta, Debata do naung paluahon hita, na tongon palua hita nang hira na so taboto, jala Ibana do na naeng paluahon hita.
Ibana do na manahi, pasauthon, manguduti dohot mambagabagahon hatuaonta. Unang mabiar hita. Marbisuk ma hita mangadopi siadopanta, nang di taon 2023 on, mangasahon goarNa, Hatuaonta ini, Amen.
(Penulis melayani sebagai Ephorus HKBP di Pearaja, Tarutung)
