Oleh Pdt Dr Robinson Butarbutar, Ephorus HKBP
GREENBERITA.com - Adong do sada peribahasa (Batak: Umpasa) di hata Indonesia na patorangkon sada parange ni sasahalak manang sapunguan na so manghamauliatehon na denggan na binahen ni na asing tu ibana, baliksa na patupa na maralo tusi. Dia ma i? I ma: “Air susu dibalas dengan air tuba,” na marlapatan: “Patupa hajahaton tu halak naung patupa nauli jala na denggan tu dirina.”
Ndang adong sian tongatonganta na so umboto peribahasa i. Tung sogo situtu do rohanta mida manang ise na patupa i di ngoluna. Alai sai adong do donganta jolma na patupa i. Ndang holan di tongatonga ni keluarga boi masa songon i.
Alai dohot do di parsaoran di tongatonga masyarakat, di negara nang angka usaha na marragam i. Angka natoras, isarana - naung manubuhon, pagodanggodangkon, pasikkolahon, mangurupi asa dapotan ulaon ianakkonna, nang paborhat ianakkonna i tu pardongansaripeon – sogo situtu do rohana molo dipatupa ianakkonna na jahat tu ibana, hape nunga tung so taretong na denggan pinatupana tu ianakkonna i.
Atik pe songon i sogo ni rohanta maradophon na songon i, sai adong do sian tongatonganta hajolmaon on na sai madabu tu parange na songon i.
Debata Jahowa Sitompa Langit dohot Tano on pe sogo situtu do rohana mida manang ise na patupa na songon i maradophon Ibana. Sogo situtu, pola tarrimas do Ibana maradophon na patupa songon i.
Pola marsundut-sundut, tolu tu opat sundut sogo ni rohanNa mida na patupasa. Maradophon bangso na pinillitNa sandiri, na pinaluaNa sian parhatobanon di Misir, na sinarihonNa uju di parhorsihan, na manjalo sian Jahowa Tano Parpadanan i – Kanaan –, jotjot do madabu tu na patupa na jahat di adopan dohot maradophon Jahowa, atik pe nunga ditonai Ibana nasida unang songon i.
Di pardalanan ni ngolunasida songon sada bangso ndang holan sahali, alai maulak loni do nasida manjalo na denggan sian Debata. Ndang taretong godang ni pasupasu binahen ni Debata tu nasida. Sian na so martano gabe martano. Sian na so mardakdanak ompu nasida gabe mardakdanak, gariada pola tung bahat, dna.
Alai ndang holan sahali, baliksa jotjot do nasida patupa na hinasogohon ni Debata. Dipatihi Debata Jahowa do nasida unang mambahen ganaganaan manang sumansuman naasing di banua toru, banua tonga dohot banua ginjang, manomba dohot mangoloi nasida, unang gabe dirimasi Debata nasida ro di sundut patoluhon dohot paopathon, alai baliksa asa mangasii rohaNa mida nasida ala diradotinasida patikNa i.
Alai, nang pe nunga marpadan tong nasida maradophon Debata na so patupaonnasida na hinasogohon ni Debata i, di pardalanan ni ngolunasida sai diulahon do apala na hinasogohon ni Debata.
Ndang sahali, alai marulak loni. Marragam dipatupa Debata mangurupi nasida unang be dipatupa na songon i, pola sahat tu na disangkapi jala dipasaut Debata asa mian di bagasan ateatenasida patikna i – ndang holan tarsurat di batu manang di hulit nang di harotas muse, alai sai diulahonnasida do hinasogohon ni Debata. Dipangido Debata asa, songon Debata, maradiannasida di ari papituhon, ari Sabbat, ari pinarbadiaan ni Debata. Alai i pe tong do dilaosi.
Hita halak Kristen Batak di sandok portibion pe, ringkot do hita patupa panimbangion ni roha dohot tondi taringot tu na dos di partingkianta nuaeng. Nunga dipillit Debata hita gabe bangsoNa marhitehite Jesus Kristus, na so bangsoNa hian gabe bangsoNa.
Marhite pandidion nabadia i, na dipatupa di bagasan goar ni Sitolusada i, nunga gabe ruas ni harajaon ni Debata hita. Dipatupa Ibana do angka na denggan tu hita, pola gabe masuk hita tu angka punguan na badia, sitean hangoluan na manongtong i, sitean arta banua ginjang i. Nunga tarpasupasu hita. Jala tasangkapi ada gabe pasupasu hita di portibion.
Dipangido Ibana do tong tu hita asa holan mangoloi Debata Sitolusada i, jala asa mamparbadiai ari Minggu i laho maradian sian angka ulaonta huhut manomba Ibana, songon dalanta manghaholongi Debata Jahowa naung patupa na denggan tu Ibana. Alai suraon do songon bangsoNa Israel najolo i hita, na patupa air susu dibalas dengan air tuba?
Ndang hibul tahaholongi Ibana marhite na so mambahen ganaganaan manang sumansuman na marragam be laho manomba dohot mangoloinasida tarlumobi di partingkian ariticial intelligence di partingkianta nuaeng?
Ndang taparbadiai ari Minggu i marhite na mansohot mulaulaon dohot manomba Jahowa di parpunguanta offline terbatas manang online manang virtual, manang duansa? Baliksa ndang holan sasada Ibana be tasomba jala taoloi, alai tong dope tabahen, tasomba dohot taoloi angka na asingna i, dohot nang angka artificial intelligence?
Jamot hita marsadasada, dohor marsasapunguan/marsasahuria. So tong hona tu hita rimas ni Debata ro di sundut patoluhon dohot paopathon ala ndang tapatupa pinangidoNa i. Sotung gabe so diasii Debata Jahowa Sitolusada i be ngolunta di ariari na naeng ro on?
Tagonan do tahaholongi Debata sian na tabahen sogo ni rohaNa. Tagonan do mian hita di bagasan holong tu Debata marhite na satia marDebatahon holan Ibana, sian baliksa. Di Bibelta i mansai bahat do contoh na denggan taringot tu panghorhon na denggan tu na satia manghaholongi Debata.
Di partingkian Covid 19 on denggan do sada contoh na mangihut on patolhason dison laho patuduhon panghorhon na denggan i: I ma ngolu ni sahalak raja margoar Hiskia di tongatonga ni bangso Juda, uju mangadopi hagogotan dirina nang bangsoNa na tongon mangadopi ancaman nabalga sian bangso ASSUR. Uju i marsahat na posa ibana, pola matematene.
Beha ma boi sada raja manguluhon bangsona uju marsahit matematene, hape tongon ro bangso na balga naeng mamolgaknasida. Ro muse ma Jahowa mandok tu ibana marhite panurirang Jesaya anak ni si Amos songon on:
“Pature ma bagasmu, ai na mate ma ho, ndang tagamon mangolu be” (Jes 38: 1)
Dia ma dipatupa raja i? “Dipahusor ibana ma bohina dompak dorpi jala martangiang tu Jahowa. On ma tangiangna huhut tumatangis:
“O ale Jahowa, sai ingot ma na marpangalaho i ahu di joloM di bagasan hasintongan dohot di punia ni roha, jala hubahen na denggan di adopan ni bohiM” (Jes 38: 3)
Dia ma na denggan dibahen Debata tu na mangoloi patikNa i? Didok Debata ma marhite panurirang Jesaya na mangihut on tu raja i jala dipatupa Jahowa songon na nidokna on:
“Nunga Hutangihon tangiangmi. Nunga Huida partangisonMi. Ida ma ambaanHu ma tu angka ariarim sampululima taon nari. Jala paluaonHu ma ho dohot huta on sian tangan ni raja ni Assur, jala ondihononHu do huta on” (Jesaya 38: 5-6)
Asi do roha ni Debata Jahowa tu angka marriburibu na manghaholongi ahu. Masuk tu na marriburibu na manghaholongi Debata i ma hita, sude ruas ni HKBP di sandok portibion. Holan sada do syaratna, i ma “Tahaholongi Ibana, sude hita angka anak dohot boru ni Raja Natumimbul i.
Angka ruas dohot parhalado na marsaor di bagasan HKBP na hinaholongonNa i. Tarlumobi ala di bagasan Jesus Kristus asi do rohaNa mida hita. “Ndang diolani Ibana Anakna sandiri, tung dipasahat do humophop hita saluhutna; tagamon ma so bahabasahononNa raphon Ibana saluhutna i tu hita? (Roma 7: 32). Amen.
(gb-ferndt01)
_11zon.jpg)
