Iklan

iklan

Iklan

,

Iklan

Renungan Minggu Ephorus HKBP: "Hagogoon ni Debata na Paluahon” (1 Korintus 1: 10-18)

Green Berita
Minggu, 22 Januari 2023, 09:56 WIB Last Updated 2023-01-23T14:54:13Z

Ginurithon ni Pdt Dr Robinson Butarbutar

GREENBERITA.com-
Hamu angka dongan sahaporseaon, di tongatonga ni hita halak Kristen Batak, adong do sada hata naung tahaporseai di na tarimangrimangi taringot tu hapapatar ni hadirion dohot ulaon ni Debata di portibion, di tongatonga ni ngolu angka na porsea i marsadasada, nang di tongatonga ni pardalan ni ngolu nang ulaon ni punguan ni na porsea i na ummetmet, i ma angka keluarganta be, nang na umbalga, i ma Pos Pelayanan nang huria na gok. 

Hata na jotjot tadok jala na sai jotjot dijamitahon, i  ma: “Hahomion”. Hahomion ni Debata. Molo taida di tongatonga ni ngolunta adong na masa na so dapot rohanta berengon, na so tardungdung pingkiranta mangantusisa, hape masa, tadok ma na i ma hahomion ni Debata. Hahomion taringot tu ulaon ni Debata. 


Isarana: Di topi ni Aek (Sungai) do uju metmet mian Joko Widodo, rap dohot among dohot inongna na sai jotjot dipalaulao/digusur. Na susa do parngoluon ekonomi ni keluargana. Alai boi do ibana lulus SMA. Boi marsiajar dohot lulus di Universitas na tarbarita, Gajah Mada di Jogyakarta. Boi ibana gabe pengusaha hau sian na metmet sahat tu na balga. Dung i boi ibana gabe Walikota Solo dua hali. 


Boi ibana gabe Gubernur DKI. Boi ibana gabe presiden RI dua hali, jala ndang holan presiden na songon i sambing, alai presiden na mansai denggan, na mamboan bangsonta Indonesia sian negara berkembang gabe tu negara transisi tu negara maju, mambahen ngolu ni rakyat Indonesia dao dumenggan di pembangunan-pembangunan na singkop, pembangunan infra struktur dohot ekonomi, gabe boi mangatasi Covid-19, boi mangadopi krisis ekonomi siala ni angka ulaonna. 


Na metmet do ibana, na so disura manang ise, hape gabe sahalak presiden na dumenggan sian saluhut presiden naung taparnampunahon. Angka bangso na balga isara Amerika Serikat, Russia nang China, dohot marnida hinadenggan ni panguluhononna jala panghorhonna di ngolu ekonomi ni bangso niuluhonna, Indonesia. Songon dia Debata mangula di ngolu ni hadirion ni Presiden Joko Widodo jala panghorhonna i tadok do hahomion ni Debata. 


Isarana: Hamu pe angka dongan, angka ruas ni hurianta na ro tu ingangan ni ngolu nang ulaon muna sinuaeng on najolo, sian hutantta di Tapanuli Raya, manang sian Simalungun tu kabupaten na asing di Sumatera Utara, jala sian Sumut tu Jawa, sian Sumut tu Riau, sian Sumut tu Papua, sian Sumut tu Borneo, jala sian Indonesia tu duru ni Indonesia laho mangula dohot mangolu dison, mamungka sian sundut na parjolo sahat tu sundut na mangaihut, ra aut sugari dibahen hamu pangarujirujion taringot tu songon dia Debata na mangolu i mangula di bagasan ngolunta, bahat do ra diida hamu hahomion ni Debata di pardalanan ni ngolumuna. 


Hea do Amang Jenderal Purnawirawan Luhut Binsar Panjaitan di angka panghataionna na padomuhon pardalan ni ngoluna di portibion dohot ulaon ni Debata, songon on: “Itulah rahasia Allah. Kita tidak tahu bagaimana, alai i do na masa di ngolungku.”


Hata na dipangke di hata Inggris taringot tu ‘hahomion’ ni Debata i, i ma the paradox ni ulaon ni Debata: Idaon ndang dapot diroha, alai molo tinangkasan jala nirimangrimangan sintong do. 


Ala siihuthon Kristus do hita, denggan do taida angka hahomion, paradoks ni ulaon ni Debata di bagasan diri ni Jesus Kristus. 


Naparjolo, mangihuthon panurirang Mika songon on disurirangkon ibana taringot tu haroro ni Sipalua i: “Alai anggo ho, ale Betlehem Ephrata, mametmethu do ho nian anggo tung pola jujuron tu angka huta marriburibu di Juda; hape sian ho do haroroan ni na gabe panggomgomi di Israel, jala angka haroroanna sian na hinan, sian angka ari na robi salelenglelengna” (Mika 5: 1). Jesus Kristus na tubu di bara ni pinahan, i do hape Sipalua hajolmaon i. 


Napaduahon, mamungka di bortian ni dainangna si Maria dope Jesus sahat tu marumur 30 taon nunga diboto Jesus ise Ibana, i ma na tinongos ni Debata tu portibion, asa palua hajolmaon sian dosa dohot sian hamatean. Jala songon na tarsurat di surat tu halak Heber, ndang mardosa ibana. 


Alai laho do ibana tu jolo ni si Johannes Pandidi di halongonan mangido asa dididi si Johannes Pandidi i Ibana. Ia pandidion ni si Johannes pandidion di hasesaan ni dosa do. Manulak do si Johannes i padidi Ibana. Ingkon baliksa ma nian. Alai dielek Jesus do si Johannes i asa olo mandidi ibana. 


Uju i alus ni Jesus tu ibana boasa songon i, didok Jesus ma na ingkon oloan ni si Johannes do patupa i asa saut nasa hatigoran (Gorik: pasa dikaionsune). Uju di tingki ni si Johannes pandidion na pinatupana do patigor sasahalak pardosa di jolo ni Debata. Alai dung mangula Jesus Kristus ia na patigor jolma pardosa di jolo ni Debata i ma haporseaon di Jesus Kristus Anak ni Debata, Sipalua i.


Napatoluhon, uju mangula Jesus na sian Nasaret i somal do di tongatonga ni bangsona di bangso i manguhum pardosa marhite na mandanggurhon batu tu pardosa i sahat tu na mate. Hea ma diboan tu ibana sahalak parompuan pardosa asa diuhum. Alai ro do Ibana mandok, manang ise sian natorop i na manghilala na so adong dosana, ibana ma parjolo mandanggurhon batu i. 


Umbege i ndang adong nanggo sada na barani mandanggurhonsa. Ai ndang adong na so mardosa. Dung i dipangido Jesus ma tu parompuan na mardosa i asa muli, alai huhut didok unang uduti mardosa. Hahomion do i di bangsoNa.


Hahomion na songon i do na diboto, dihaporseai jala dihaposi apostel Paulus di ulaonna songon parbarita nauli najolo di angka kota na adong di bagian ni Kekaisaran Romawi di bagian Timur/Habinsaran. Di na marbarita nauli ibana tu pangisi ni kota Korintus, i ma sada Miniatur ni Kota Rom di Timur, kota ekonomi na martumbur ala ni posisi ni kota i songon kota pelabuhan, jala dipajongjong Kaisar Julius Caesar, jala ala ni i bahat diurupi Kaisar di pembangunanna na pinatupa ni pangisina, hahomion ni ulaon ni Debata na songon i do diingot jala dipatupa ibana. 


Dung diparsiajari ibana songon dia halak Korintus tarlumobi angka patronnasida (i ma na marnampunahon angka hatoban jala na gabe pengusaha marhite ulaon ni angka hatoban i), diboto ibana ma na lomo situtu roha ni halak Korint on manjou angka pande bisuk, filsup, tarlumobi angka filsuf Sofis, tu bagas nasida laho pahehahebahon hapistaran marfilsafatnasida. 


Bahat do angka filsup i na ro sian Atena laho patupa i. Molo lomo roha ni patron na mora i ba dijou ma muse filsof i ro tu bagas nasida laho patorangtorangkon habisuhon ni portibion. 


Molo ndang tabo dibege pinggolnasida, ba ndang dijou be nasida. Habisuhon ni filsuf Gorik, i ma na mangondolhon hapistaran ni pingkiran ni jolma i. Na so dapot roha ni jolma i ndang jaloon i gabe habisuhon. Haotoon do i. Ndang dihalomohon halak Gorik na so dapot di roha ni pingkiran ni jolma i. I do umbahen na sai tu Atena do ditongos angka natuatua ianakkon nasida marsiajar filsafat. 


Di kota Korint pe angka dongan adong do tong mian jala mangolu disi halak Jahudi. Ai mangihuthon penggalian arkeologi dapot do di tingki mangula apostel Paulus di Korint i ma di taon 51-52 Sinagoge ni halak Jahudi. Di halak Jahudi songon pomparan ni si Abraham, si Ishak dohot si Jakob, songon naung mananda si Musa nang angka uluan ni bangso Jahudi na sai marporang maradophon angka bangso na di humaliangnasida asa boi nasida martahan mansai bahat do diiida nasida hagogoon ni Debata. Hagoon ni Debata do na paruar Israel sian Misir. 


Hagogoon ni Debata do na mambola jala pahiang laut rara pataripar nasida sian angka soldadu ni Misir. Hagogon ni Debata do na patau angka raja nasida mamungka raja Saul tu Raja Daud na pamonang nasida di parporangan maradophon angka musu nasida. Isara, andorang so partingkian harajaon, hagogon ni Debata na patau si Simson mangarumpakhon ingangan parpunguan dohot panombaan ni halak Filistin, gabe mate marribu na tongon mian disi. 


Bahatnai dope na boi goaronta taringot tu hagogon ni Debata marhite hamomonang maradophon angka musu nasida. Ala ni i, di na di bagasan penjajahan ni halak Gorik, dung i marudut penjajahan ni halak Roma bangso Jahudi andorang so ro Kristus jala dung i di abad parjolo, diingot bangso Jahudi ma pengalaman ni angka ompunasida maralohon musu, i ma marhite hagogoon ni Debata do boi paluaon ni Debata nasida sian halak Rom. 


Marhite porang ma dibahennasida, jala dipatao Debata ma nasida marhite porang i manaluhon penjajahan na tongon diae nasida. Ingkon marhite dalan na songon i do. Ndang tarjalo nasida songon hasintongan molo so marhitet dalan na songon i. Hagaleon do na maralo tusi. Ndang hagogoon. Asa, ndang tarjalo nasida molo adong na mandok boi Debata na gogo i paluahon bangsoNa marhite dalan na diida hagaleon.


Tu angka pangisi ni huta Korint na songon i do ro apostel Paulus mamboan barita nauli taringot tu Jesus Kristus i. Hamu angka dongan, sian bona sahat tu ujung ni ulaonna di kota Korint na songon i i do dibaritahon apostel i barita taringot tu Jesus Kristus naung manaluhon hamatean, naung manaek tu banua ginjang jala na hundul di siamun ni Debata i. 


Isi ni barita nauli na binaritahonna tu nasida ndang na asing ia so Jesus na tarsilang i, na tu halak Gorik haotoon do i, ndang habisuhon ni Debata, jala tu halak Jahudi hagaleon do i ndang hagaleon ni Debata: “Alai Kristus na tarsilang i do hujamitahon hami; pargasipan do i di halak Jahudi, hatotoon di sipelebegu. Alai di angka na tarjou, nang Jahudi nang Gorik, gabe hagogoon ni Debata dohot habisuhon ni Debata do Kristus i  (1 Kor 1: 23-24). “Ai haotoon do hata na taringot tu silang i di roha ni angka na laho mago, alai hagogoon ni Debata do i di hita na dapotan haluaon (1: 18). 


Gariada nang apostel i pe mangula di bagasan hagaleon ni pamatang do uju mamaritahon barita nauli taringot tu Kristus i uju di Korint ibana. Gabe porsea do halak Korint i, na so apala na bisuk jala na gogo haroroanna, angka hatoban na diboan halak Rom do nasida tu Korint di taon 44 andorang so ro Kristus, sebelum masehi. 


Alai dung borhat apostel Paulus sian i ro ma sahalak parbarita nauli na margoar si Apollos, na tung malo marretorika, na malo manghatai. Ala songon i ibana, gabe adong ma sian tongatonga ni halak Korin tarunjun muse mangihuthon halak Gorik na manghalomohon habisuhon nang di panghataion, di jamita. 


Ala ndang songon i apostel Paulus i mangula di tongatonga nasida andorang so ro Apollos, gabe marbolat ba ruas ni huria i. Adong na hot maniop apostel Paulus songon apostel ni Kristus na mamaritahon silang i. Adong na mar-Apollos, ala ni hapistaranna marjamita. 


Alai laos adong na so mangihuthon dalan ni apostel Paulus marbarita nauli, ndang mangihuthon Apollos, alai na mandok si Petrus do ianggo na sasintongna apostel na asli. Alai laos adong ma tong na mandok tolunsa ndang apala na tumimbo di ahu. Jolma do i. Kristus i sandiri do di nasida. 


Panghorhonna gabe dohot ma barita naung binaritahon ni apostel Paulus i toru diida angka na so mar-Paulus. Ala ni i ma di suratna tu halak Kristen na di Korint i dipatangkas apostel i ma muse saulak nari, jala togu dipertahanhon ibana, dung dipatolhas ibana isi ni rohana na ndang dihalomohon ibana parbolatbolatan, schismata i na masa di tongatonga nasida: “Ai haotoon do hata na taringot tu silang i di roha ni angka na laho mago, alai hagogon ni Debata do i di hita na dapotan haluaon” (1 Kor 1: 18; 23).


Hamu angka dongan, ndang dihalomohon apostel Paulus  parbolatabolatan i. Di bindu 12-14 tung tangkas do dipangido ibana tu nasida asa unang be marbolat, alai sada ma di parsaoran ni angka na porsea i. Alai di bona di suratna on disangahon ibana do mangulahi mamaritahon naung binaritahonna di Korint uju disi ibana (1 Korint 1: 18, 23). 


Jala songon na taida di 2 Kor 12: 8-9: “Tolu hali hupangido sian Tuhan i, asa sumurut i sian ahu. Gabe didok Ibana tu ahu: “Tuk ma asi ni rohangku di ho; ai di hagaleon do sun timbul hagogon.” Asa, tagonan ma hupapujipuji diringku di bagasan angka hagaleonku, asa songgop tu ahu hagogoon ni Kristus Jesus.” 


Hamu angka dongan hinaholongon. Barita nauli na pinatolhas ni apostel Paulus tu halak Korint i najolo do tong na gabe jamita di hita nuaeng di partingkianta di taon 2023 on, di tingki na mangihuthon ekonom mansai maol di ngolungolunta. Di partingkian na songon i olo do gabe sarupa dohot halak Gorik nang halak Jahudi caranta marnida ulaon ni Debata, taringot tu haluaon na sian Debata tu hita angka pardosa on. 


Jamita on mangarataratai tu hita asa unang tahalupahon i: Nunga angka na pinalua ni Debata hita marhitehite Jesus Kristus na di Debata habisuhon jala hagogoonNa. I do umbahen na malua be hita ruas ni HKBP. Hahomion ni Debata do i.


Hahomion ni Debata na songon i do tong na mansai ringkot haporseaonta di na taadopi angka na maol di tongatonga ni ngolunta. Mangula do Debata marhite hahomion na songon i di tongatonga ni ngolunta. Berengon ndang mangula Debata, alai mangula do Ibana, alai ndang marhite angka dalan na dapot rohanta. Baliksa, jotjot marhite dalan na so dapot rohanta. Marhite hahomion ni Debata. Marhite paradoks ni Kristus. Nunga dipalua Debata hita marhite paradox Kristus. 


Gariada anakNa na sasada i dipelehon Ibana humophop hita. Lam ma angka ondeng so palumehononna tu hita.” Ndang diolani Ibana AnakNa sandiri, tung dipasahat do humophop hita saluhutna; tagamon ma so basabasahononNa raphon Ibana saluhutna i tu hita?” (Rom 8: 32). I ma tahaporseai angka Dongan. Marhuaso do Debata patupa hahomionNa nang di ngolunta nuaeng. 


Hahomionna i boi do ndang dapot rohanta. Alai mangula do Ibana mangaramoti nang mamasumasu hita angka bangsona, huiaNa, marhite dalanna na homi. “Hagogoon ni Debata na paluahon” i nunga dipatuduhon marhite ngolu nang ulaon ni Kristus na so dapot roha ni na bisuk dohot na gogo ni portibion. PatupaonNa do tong hagogoonNa na songon i paluahon hita sian angka parmaraan di portibion. Amen.


(Penulis saat ini melayani di Kantor Pusat HKBP Pea Raja Tarutung Sumatera Utara sebagai pucuk pimpinan HKBP)

Iklan