Renungan Minggu Ephorus HKBP: Manaon Na Porsuk Songon Siihuthon Kristus -->

VIDEO

Renungan Minggu Ephorus HKBP: Manaon Na Porsuk Songon Siihuthon Kristus

Minggu, 23 Oktober 2022

Ephorus HKBP Pdt Dr Robinson Butarbutar bersama Istri

Oleh: Pdt. Dr. Robinson Butarbutar, MTh

GREENBERITA.com- Sada na tangkas taboto di pardalanan ni panghaporseahonon di Jesus Kristus, mamungka sian uju Jesus Kristus i sandiri mangulahon na tinurgashon ni AmaNa tu Ibana sandiri sahat tu ngolu jala ulaon ni angka siseanNa di Palestina dohot di duru ni Palestina dohot tu angka sisean/dongan saulaonnasida na ro sian sundut na umposo, i ma tantangan na ro sian duru ni dirinasida nang na ro sian angka na manggoari dirina siihuthon Jesus dohot angka siseanNa alai na so lomo roha di angka apostel i tarlumobi apostel Paulus i. 

Tantangan na ro adong na mangotapi ulaon ni Jesus, ulaon ni angka siseanNa, nang ulaon ni angka sisean ni angka sisean i. Sudena i andar do di angka buku dohot surat ni Padan Naimbaru i. Jesus sandiri manaon do sian angka na di humaliangna. 

Apostel Paulus pe songon i do. Jala angka na porsea na rap dohot apostel Paulus mangula ulaon mamaritahon barita nauli i pe manaon do. 

Alai na mansai mangapuli roha i ma na diadopi Apostel Paulus nang angka na mangula rap dohot ibana do na maol i, parungkilon, manang paraloon sian angka na so manghalomohon nasida patupa ulaon i. Siala ni i do mansai bahat do di evangelium i barita taringot tu paraloon niadopan ni Jesus. 

Mansai bahat do nang di angka surat na adong di padan na imbaru parungkilon i angka poda songon dia mangadopi panaonon siala ni na mamaritahon barita nauli. Songon dia Jesus mangadopi parungkilon na ro sian na di humaliangna andar do di ganup evangelium na di surathon sada tu dua jala tolu dekade sian angka surat-surat na tumua, i ma surat na ginurithon ni apostel Paulus i ma surat 1 Tessalonika nang surat tu huria di Rom, dohot na umposo isara surat tu si Timotius, dohot surat Heber, surat 1 Petrus nang surat Pangungkapon.  

Di surat 1 Tessalonika, Surat Rom, surat Heber, surat 1 Petrus nang sian Surat Pangungkapon. 
Na gabe jamita di hita di partingkianta nuaeng, i ma sian surat 2 Timotius, na dipasahat tu sundut paduahon ni halak Kristen, na pasahathon poda sian sahalak na tong naung mangadopi panaonon siala mamaritahon barita nauli, i ma apostel Paulus na didok manaon siala mamaritahon barita taringot tu Jesus naung dipahehe sian hamatean, sada barita na so dihaposi halak Jahudi nang halak na so Jahudi. 

Tardok bagian ni ulaon mamaritahon barita nauli i do ia panaonon siala ni i. Songon i do sahat tu naueng. Gariada nang na so pola ingkon borhat sian ingananna mangolu laho mamaritahon barita nauli tu halak na asing di luat na asing, holan ala ni na halak siihuthon Jesus, halak Kristen ibana gabe ditaon ibana naporsuk. 

Si Timoteus i ma sahalak na manorushon ulaon mamaritahon barita na uli i. Dohot do ibana manaon. Alai mamungka sian partingkian di Padan Naimbaru sahat tu tingki on, bahat do tong na manaon sitaonon holan ala mangihuthon Jesus, mangulahon lomoNa dohot siala ni na manomba Ibana. I do na masa isarana di angka inganan dohot negara na so apala toleran adong pendudukna tu angka siihuthon Jesus. 

Songon dia duansa, i ma na mamaritahon barita nauli taringot tu haheheon ni Jesus dohot angka sisomba Ibana mangadopi panaonon/parungkilon i songon na dipaandar tu si Timotus i do sirimangrimangonta di bagasan minggunta sadarion, minggu pa-XIX-hon dung Tinitatis.

Tu angka parbarita nauli na manaon siala mamaritahon barita nauli, adong poda na mangihut on: Naparjolo, margogo di bagasan asi ni roha ni Kristus Jesus (ayat 1). 

Napaduhaon, tongtong hibul roha, unang mardua roha, tarlumobi mamingkiri angka na manggugai ulaon mamaritahon barita nauli, i ma parungkilon i sandiri (ayat 4-5). Hot fokus. 

Napatoluhon, marningot na dapotan upa do angka na songon i mangula: Ingkon siula hauma i jumolo di parbuena (ayat 6). 

Napaopathon, maniru apostel Paulus, i ma benget patupa na denggan tu angka na tarpillit (ayat 9-10, 12) i ma mamaritahon barita nauli i, ai adong do jambar na denggan di angka na manahan sahat tu hamatean, i ma marhangoluan dohot Jesus Kristus di hangoluanNa, Ibana naung dipahehe sian hamatean (ayat 11-13). 

Hamuna angka dongan, di tongatonga ni Hakristenon ia na targoar parbarita nauli taringot tu Haheheon ni Jesus Kristus sian hamatean ndang be holan songon angka na ulaonna ganup ari i ma mamaritahon barita nauli, angka missionaris, angka pangula gok tingki. Alai nunga dohot be angka ruas ni huria marsadasada na mangula di angka ingangan siganup ari nasida, adong uju disungkun halak haporseaonna, adong nang angka na so apala disungkun, alai manghilala tarjou ibana pasahathon barita taringot tu Jesus tu angka donganna saulaon. 

Adong tong na mamaritahon barita nauli taringot tu Jesus marhite angka ulaonna na denggan di ulaonna siganup ari. Adong tong angka na mangulahon ulaon asi ni roha, denggan basa, ala nunga angka naung dipalua, angka naung tarpasupasu ibana, sihol rohana nang na asing boi nian mandai na dos. 
Ganup naung tardidi i ma imamat am yang Rajani. 

Di partingkian nuaeng on, atik pe nunga lam maju hajolmaon, sai adong do na mamangke dalan na marragam laho manusai angka siihuthon Jesus, angka siulahon lomo ni roha ni Kristus. Gabe manaon nasida siala dihatindangkon Jesus na hehe, siala diulahon lomo ni roha manang pangajaron ni Jesus, siala disomba Jesus Kristus Sipalua i.

Di na taadopi na songon i, mansai ringkot do poda na di 2 Tim. 2: 1-12 i tatangihon, tapeop jala taulaon, i ma: hot margogo, hot fokus, hot manghirim di upa, dohot benget.

Dipargogoi Tuhanta i ma hita patupasa, Amen.


(Penulis adalah hamba Tuhan yang saat ini melayani sebagai Ephorus HKBP)

Loading...