Pinatolhas ni Pdt Dr. Robinson Butarbutar, Ephorus HKBP
GREENBERITA. com - Hamu angka Dongan sahaporseaon dohot hinaholongan di bagasan Kristus Jesus Tuhanta I, Na di ari Jumat i, 19 Pebruari 2021 i, dina manghatai Presiden naimbaru ni Amerika Serikat, Joe Biden to angka peserta ni Parjumpangan Keamanan di Munik Jerman secara virtual sian Amerika dipatolhas ibana do angka sangkap nauli ni bangso niuluhonna tu portibion.
Sada sian i i ma mulak ma muse nasida tu Kesepakatan Kiyoto – Jepang na di taon 2015 i – naung dipaimbaru di Kesepakatan Paris – naung sanga ditadingkon Amerika uju diuluhon mantan Presiden Donald Trump bangso i.
Ia na tinuju ni Kesepakatan Kiyoto i ma rap marusaha ma angka bangso di portibion mangorui emisi, mohop ni portibion. Urupon ni angka bangso na maju jala na mora ma angka bangso na tartading, pogos jala berkembang asa uju membangun nasida ndang pola sai ingkon disegai nasida be lingkungan hidup, alai manjagaisa ma. Nunga ditanda tangani 181 bangso kesepakatan i di taon 1997, jala dibonai patupahonsa/mangulashonsa di taon 2005.
Boasa ingkon adong kesepakatan i? Ala, molo lam mohop portibion, boi do masa na dua na mangihut on, i ma sangombas banjir, aek na sumar, siala haroro ni udan na marasing jumotjotna sian andorang so lam mohop portibion, i ma haroro ni udan na so mar na so; alai sangombasnari di inganan na asing masa kemarau panjang dohot martutungan harangan ala ni mohopna, gabe sibonsiri haleon potir adopon ni angka jolma, taonon ni hajolmaon dohot angka na mardaging na asing di portibion. Songon i ma mohop ni ari pola boi mambangkar hulit ni jolma i.
Di bulan Pebruari on nunga taida i di Indonesia, masa angka banjir di Jawa Barat, di Kalimantan, dohot parpudi on di DKI. Isarana, pargodungan ni HKBP Mampang Prapatan manaonsa, pola 1,5 meter aek udan manggohi pargodungan i, songon na andar di gombar tinongos ni Pdt Sanghormat Banjarnahor tu hami nantoari.
Ala songon i ma jorbut ni na naeng masa tu hita jolma molo sai lam tamba mohop ni portibion, pola do diusahahon angka bangso na pistar dohot na mora di portibion patupa penelitian tu duru ni portibion, i ma tu planet MARS, jala nunga sahat pesawat NASA Amerika tusi di ari Jumat i, laho marnida manang na boi do jolma mangolu disi, jala adong disi nab oi dalan ngolungolu ni jolma.
Boasa huhalashon sangkap ni Presiden Amerika Joe Biden pinatolhasna di ari Jumat dua ari na salpu i di pidatona tu portibion, na mandok rap ma muse negara Amerika Serikat patulushon tinuju ni Kiyoto Protokol i? Alus: Ai hata ni Debata na mamanghulingi hita sadarion mandok najolo tu si Noak, dung masa masa aek na sumar mangalengsehon angka pardosa, dung manolsoli Debata pamasa i, jala tu hita pomparan ni si Adam dohot si Eva mamungka sian i sahat tu nuaeng di taon 2021 on, paboahon dia lomo ni roha, sangkap dohot bagabaga ni Debata tu hitaon anak dohot boru ni hajolmaon tinompaNa i, songon i nang sude angka na mangolu na tinompa ni Debata na rap mangolu dohot hita di portibion.
Dia ma lomo ni roha, sangkap, bagabaga ni Debata i? I ma: “Pahoton dohot ingotonNa ma marhite huasoNa padanNa tu hita rodi saleleng ni lelengna, na so jadi be ripashononNa hita marhite aek na sumar dohot na dos tusi. Dalanna marningot padanNa i dipatupa Ibana ma halibutongan.”
Sada sian dalan ni huaso ni Debata laho manggohi bagabagaNa tu hita i, i ma Kesepakatan Kiyoto i, na dionjar Ibana marhite angka pejuang lingkungan hidup.
Najolo holan angka aktifis lingkungan hidup do na manoarahon i. Alai dung Kiyoto Protokol i ndang holan nasida be. Alai nunga dohot angka pamarenta dohot angka Perusahaan na marjanji mamangke teknologi na maraleale dohot lingkungan hidup. Najolo holan rakyat dohot negara ni angka bangso na maju jala na mora do na sai mangondolhon asa dipatupa jolma i non i. Alai dung Kiyoto Protokol i nunga dohot bangso-bangso na pogos jala na tongon berkembang mangusahahonsa, termasuk bangsonta Indonesia naung meratifikasisa. Dohot do hita menanda tangani Kesepakatan Paris di taon 2016, na patoguhon Kyoto Protokol i, jala nunga adong Undang-undangta No 16/2016 psauthon i.
Dipangke Debata do hita gabe huasoNa laho tongtong marningot hinahot ni bagabagaNa manjagai hita hajolmaon, unang pidom, pinapidom ni aek na sumar manang kemarau panjang siala ni na lam mohop portibion. Boi do hita gabe ulaula ni huasoNa marhite na dohot hita patupa pangaramotion di lingkungan hidup di humaliangta, di hutanta on, maradophon hasomalan dohot sangkap-sangkap pamohop portibion, isara marhite na mambangkar sampah, manutung haranganta, alai dohot do marhite angka pabrik-pabrik na pamohop portibion, nang mangambolongkon angka sampah ni jabunta tu sunge.
Dipangke Ibana do Presiden Joe Biden nang Presidenta Jokowi dohot angka Menteri na mangurupi ibana, songon i nang angka na asing laho mangorui emisi manang mohop ni portibion.
Alai molo gagal do jolma i, ndang tuk mangoruisa, pos do rohangku tong na marhuaso do Debata marhite angka dalanNa na so tardodo hita laho manggohi padanNa tu hajolmaon na so loasonNa, na so sangkapanNa mangalengsehon hajolmaon on. Di sejarah ni pardalan ni hasiangan on, tarlumobi portibion, marragam dalan ni Debata mangaramoti hajolmaon i unang be marujung ngolu siala ni angka na masa. Asa, lam tahaposi ma Debata di ariari na naeng ro on.
Molo domu tu keberlangsungan manang hahohot ni ngolunta tinompaNa di portibion marhuaso do Debata manjagai ngolunta salelenglelengna, tarbahen Ibana do tong mangaramoti, mangondihon dohot manarihon hita hinalonganNa ruas ni HKBP di pargulmiton ni ngolunta di ariari na naeng ro. Tarida do i, isarana, marhite haradeon ni Vaksin Covid 19. Molo ndang dapotta Vaksin tu Covid 19 i di bulan Nopember nasalpu, ndang gok sataon dung masa Pandemi Covid 19 i, ba olo do hatop mago hajolmaon i.
Jala nuaeng, dung rade Vaksin tu Covid 19 i, ulaonta songon angka anak dohot boru ni Debata i ma parade Vaksin i tu sandok penduduk ni portibion, unang holan rakyat ni negara na mora di negaranegara majo na dapotan, alai dohot ma tong nang rakyat ni negara-negara miskin. Ala ni i, tahalashon jala tatangiangkon ma pamarenta pusat dohot daerahta, termasuk Taput niuluhon ni Bupati Nikson Nababan, Simalungun niuluhon ni Bupati JR Saragih dohot na asing pe tahe naung mamonai vaksinasi mangalo Covid 19 i. Jala tahalashon do usaha ni hajolmaon patupa lumbalumba manjagai dirinta maradophon serangan-serangan biologis tu hajolmaon.
Nang tu na ringkot di ngolunta siganup ari, hot do Debata di bagabagana tu hita ruas ni HKBP di tanggal 1 dohot 3 Janari 2021 i na mandok na pasupasuonNa do hita di na ringkot di pardagingon marhite pasupasu na ringkot tu ngolu pardagingonta, nang di na ringkot di partondion, i ma pasupasu pardagingon ganup ari.
Ala ni i, tama do hita mamujimuji Debata na satia jala hot di padanNa jala marhuaso matupasa mangaramoti sude hajolmaon dohot dirinta marsadasada. Ai gari anakNa na sasada i dilehon paluahon hita (Roma 8: 32: Ndang diolani Ibana Anakna sandiri, tung dipasahat do humophop hita saluhutna; tagamon ma so basabasahononNa raphon Ibana saluhutna i tu hita?). Amen.
(gb-liem,/rel)
