Renungan Minggu Misericordias, Ephorus HKBP: 'Gok Asi ni Roha ni Jahowa do Tano on'

 

Ginurithon ni Pdt. Dr. Robinson Butarbutar

GREENBERITA.com- Hamuna angka Dongan hinaholongan.,

Di angka naung porsea di Tuhanta Jesus Sipaluanta na manongtong i, ia pardalanan ni ngolunta marpanatapan tu jolo do, i ma tu na manongtong di jolo, ndang marpanatapan tu na na di pudi, nang tu na di tingkion nuaeng di tano on. Digoari do ngolu na marpanatapan tu jolo i eskatologi, i ma hata na marharoron sian dua hata, eschatos, tingki umpudi di jolo, dohot logos, parbinotoan taringot tu sada hamamasa. 

Di hata Inggrisna na sederhana, didok forward looking life, ngolu na manatap tu jolo, i ma ngolu na marojahan tu sidungdungon di jolo. 

Dia ma na ditatap di jolo i? Songon na ginurithon ni panurat 1 Petrus tu angka huria na marserak di angka kota na di Pontus, Galatia, Kappadosia, Asia dohot Bitinia uju digurithon, alai nuaeng tu angka na porsea di sandok portibion, dohot ma tu angka ruas ni HKBP, ia na ditatap na di jolo i, i ma Siteanonta di jolo, siteanon na manongtong na simpan di banua ginjang (1 Petrus 1:4). 

Marhite na taharposeai hadirion dohot ulaon ni Jesus na manubuhon hita paduahalihon sian godang ni asi ni roha ni Debata marhitehite haheheonNa sian angka na mate, jaloonta ma ujung ni haporseaonta i ma haluaon ni tondinta, naung niluluan dohot pinamanatmanat ni angka panurirang i alai naung dipapatar tu hita mamungka abad parjolo (1 Petrus 1: 9-12). 

Haluaon ni tondinta di jolo i do na ingkon tataponta, na manuturi hita di pardalanan ni ngolunta nuaeng di portibion. Na tatatap di jolo i, ngolunta di ari parpudi, eschatos, i do na manontuhon dohot mangajari hita songon dia hita mangolu nuaeng di ngolunta andorang so tadai na di jolo i. Ingkon saurdot tusi do ngolunta. Na so jadi hita mangolu maralo tusi, manang mangolu marhite dalan ni ngolu na so saurdot tu na tahirim di jolo i. Asa, manang ise na mambahen sianon di jolo, i ma haluaon ni tondinta i di jolo, ndang oloon ni i be mangolu maralo tu na naeng teanon di jolo. 

Dia ma i? I ma marhangoluan saurdot tu na hinasiholan ni na badia i. Dia rumang ni ngolu na badia i songon dalanta mangulahi tubu biahen ni hata ni Debata, i ma marhite ngolu na dihasiholi Debata nabadia i, i ma ngolu na marhabadiaon.

Songon dia i? I ma na dialusi jala diondolhon di 1 Petrus 1: 17-23. I m na dienet gabe jamita di hita di minggu Misericordias Domini sadarion, Gok asi ni roha ni Jahowa do sandok tano on, na tarida tangkas idaon, auhonon, dohot hatindanghononta marhite na mangolu hita di portibion ndang be marparange na robi na tahasomalhon andorang so porsea dope hita di Tuhanta Jesus Kristus dohot ulaonNa, i ma naung mate jala dipahehe huhut manjalo hasangapon sian Debata (ayat 19), alai Mangulahi tubu di bagasan Hata ni Debata. 

Opat na mangihut on ma dipatorang di 1 Petrus 1: 17-21, i ma: Parjolo, marparange marhatahuton (Gorik: en phobo paroikias ), ala ndang marnida rupa Debata manguhumi jolma, jala ala naung mansai arga hita ditobus marhite mudar ni Kristus na arga jala na so hasurahan i (ayat 17-19), i ma marhite naung mate, dipahehe jala manjalo hasangapon sian Debata Ibana; Paduahon, pias roha (Gorik: katharas kardias); Patoluhon, marpangoloion di hasintongan (Gorik: hupakoe tes aletheias); Paopathon, mangeahi haholongan na so marlaok (Gorik: Egkalesete etenos) di dongan asa masihaholongan situtu na porsea i sama naporsea sian nasa roha (ayat 20-21). 

Ala ni haluaon ni tondinta di jolo, naung tabonai nuaeng jala dapotan hagogokna di ari parpudi, di portibion ndang be marhangoluan na maralo tu naung mangulahi tubu hita, alai songon angka naung mangulahi tubu ma, i ma marhite na manghangoluan na marhatahutan, na ias roha, na marpangoloion di hasintongan, ndang baliksa mangoloi na maralo tusi, tu gabus, jala na marhangoluan na manghaholongi sama dongan. 

Molo tajaha na ginurithon ni apostel Paulus di angka suratna dohot na ginurithon na panurat na mangojahi suratnasida tu naung niajarhon jala ginurithon ni apostel Paulus, dos do i tu marhangoluan na imbaru, i ma marhangoluan na paimbaru pingkiran na mangatur parange ni jolma i. 

Opatsa i do na ringkot sirimangrimangonta di tingkion, marhite na patupa parjolo pamaresoon ni diri, introspeksi, songon dia hita mangolu mamungka dung tardidi hita, jala dung i patupa sada sangkap na imbaru laho patupahonsa di ariari na ro on. Suraon do songon angka ruas ni HKBP hurang jamot dope hita padalan ngolunta naung tinobusna i, nang mangulahon angka ulaonta, di hata nang di pangulahononta, gabe muraura hita madabu tu bagasan dosa. lomolomonta marpangalaho, ndang di bagasan biar maradophon Debata, unang targoar Kristen hita, hape tatondong dalan hamagoan i di angka gulmit ni ngolunta, gabe ndang marhangoluan na tarpasupasu jala na tarpasupasu ngolunta, baliksa gabe siparo hasusaan tu ngolunta nang tu ngolu ni donganta jolma? Manang nunga tardok naung marpareangehon ngolu na marhatahutan be ngolunta, jala ala ni nunga ingkon tahamauliatehon tu Debata ala dijagai do hita tongtong asa polin. 

Suraon do sai taoloi dope nang angka na so ias mian di bagasan rohanta, ndang dope tapaias rohanta sian angka sangkap-sangkap na jat, sian angka dosa, songon na pinaingot ni Tuhanta Jesus tu hita angka siseanna na mandok na mian di bagasan rohanta i do na mambahen hita ndang ias, ai di rohanta i do angka sangkapsangkap na jat tubu, na mambahen hita manghatahon dohot mangulahon angka ulaon na maralo tu ngolu na imbaru tubu? Ndang apala taloas dope dipaias modar ni Jesus i rohanta on, ndang taloas dope Tondi ni Tuhanta i mian jala mangarajai huhut manuturi rohanta i? Manang nunga be, jala tauduti ma paias rohanta be sian angka na maralo tu na hinalomohon ni Tuhanta.

Suraon do di bagasan ngolunta, ala ni angka kepentingan-kepentingan sempit dohot angka kepentingan-kepentingan sesaat, sari di diri, gabe ndang be marhangoluan na mangoloi hasintongan ngolunta. 

Boi gabe tapapeol hasintongan di angka panimbangnimbangion ni pikkiranta andorang so manang di na mangulahon ulaonta, profesinta, i ma ulaonta na tapatupa asa dapotan ngolungolu hita, asa tardungdung hita sintasinta ni ngolunta? Suraon do tapapudi hasintongan nasailaon, alai tapatujolo kepentingan, tapatujolo alo ni hasintongan? Dison ma hita ringkot marsiajar muse, muba, manang - molo dung do taoloi hasintongan - asa tauduti ma mangoloi hasintongan?

Suraon do ndang tapatupa be ulaon manghaholongi di tongatonga ni bagasta, ulaonta, parsaoranta, nda holan manghatahon holong do na tahalomohon, ia mangulahon ndang apala ringgas dope hita? Di tongatonga ni negaranta, unang ma holan karikatif, manang musiman holongta, alai ingkon fundamental jala esensial ma tapatupa di negaranta, i ma manghaholongi marhite patupa sistim na tigor, sistim na masisarian, sistim na masiurupan, ndang holan manarihon na tuk, alai ingkon manarihon sude nasa jolma na tinompa ni Debata, tarlumobi di era ekenomi bebas, sotung taoloi jongjong sada sistim di negaranta na holan mangondolhon kapitalisme, alai ingkon dohot do rap mardalan sosialisme, ulaon manarihon na so tuk, na pogos, na marsahit, na so mardihadiha.

Dipatau Debata ma hita sude ruas ni HKBP mambahen haluaon ni tondinta di jolo manuturi dohot mangajari hita mangolu di partingkian ni ngolunta di portibion. Naopat na di ginjang i ma pangurupion pinatolhas ni apostel Petrus tu hita angka donganna sahaporsaon di Tuhanta Jesus Kristus i, na patupa haluaon ni tondinta di jolo. 

Rap ma hita patupa angka pangangarujirujion taringot tu songon dia hita nasailaon mangulahon ulaonta dohot mandalanhon ngolunta. Jala rap ma hita mangulahon na opat i tu jolo, dalanta manghalashon haluaonta di jolo. Amen.

(Penulis saat ini melayani sebagai pucuk pimpinan HKBP di Pearaja Tarutung Sumatera Utara)