Tarlumobi di tingkion uju musim ngali, tung marungkil do bahat jolma. Jala molo ndang tibu mansohot porang on, baliksa mangararati, boi ma nang angka bangso na asing dohot manaon.
So sidung dope paraloonta pasohot Covid-19 mambahen maol ngolungolu, bahat dope na so dapotan ulaon, nunga migor ro muse porang on.
Di partingkian na songon i na taadopi nuaeng, angka dongan, di sada parmingguon/minggu di na taongku muse na Jahowa do partanobatoanta, Estomihi, dipanghulingi Debatanta i hita ganup marhite hataNa pinatolhasNa najolo marhite panurirang Jesaya tu bangso Israel na tongon marungkil di habuangan jala na manghirim di hamumulaknasida sian habuangan, tano parhatobanon tu bona pasogitnasida, tano haluaon sian angka musunasida, alai na dung songon i leleng ndang dope marnida tanda na paluaon ni Debata ma nasida, na saut ma sangkapNa tu nasida na hinatahononNa tu ompunasida uju so tarbuang dope marhite angka panurirang andorang so habuangan jala tarlumobi dung tarbuangnasida tong marhite angka panurirangNa di partingkian habuangan.
Na hinatahonNa i ma ndang salelengna nasida tarbuang. Ndang salelengna nasida tabanon ni bangso Babel, alai boanonNa do nasida mulak tu Bona Pasogitnasida.
Alai dung songon i lelengnasida tarbuang ndang marna adong dope tanda di hamumulaknasida sian Babel uju i.
Ala ni i gabe moru ma hiras ni rohanasida manghirim mulak. Gariada gabe bahat ma na gabe manghalashon hamiannasida di habuangan i. Tarida do i na di ujungna, di na uju bungka dalan tu hamumulaknasida adong do tong na so olo mulak be.
Songon na andar di buku ni panurirang Jesaya bindu 55 on, tu sada bangso na tongon moru di panghirimonna tu hasasaut ni hata ni Debata pinatolhasna marhite angka panurirangNa ala nunga songon i lelengna na tarbuang i ma dipatolhas hataNa i na mandok na so jadi mulak boti hataNa tu Debata i sandiri.
Ingkon manjadi manang marparbue do hataNa i.
Dia ma hataNa na ingkon saut i tu nasida?
Di bagasan bindu 55 on, adong dua na ingkon pamanatonta, i ma na sada jumpangta di ayat andorang so ayat 10, na sadanari di ayat dung ayat 12.
Napajolo di ayat 7-9 didok songon on, na patuduhon hinaringkot ni hamubaon ni roha ni na tarbuang i.
"Sai lului hamu ma Jahowa, binsan tarbahen dope jumpang ibana; jou hamu ma ibana, binsan jonok dope ibana. Sai ditadingkon halak parjahat i ma dalanna, jala jolma pargeduk i, angka sangkapna, sai mulak ma ibana tu Jahowa, asa marpangulahi rohana mida ibana; dohot tu Debatanta, ai buas do rohana manalesei."
Adong pangidoan ndang holan mangalului Jahowa, alai dohot do mangidohon hamubaon ni roha, mangoku dosa asa disalasehon Debata dosana (di ayat 6-7).
Napaduahon di ayat 12 na dipatogu di ayat 13, i ma na patuduhon hinahibul ni sangkap ni Debata so ingkon marsigantung tu hamumuba ni pardosa i.
Tarsurat songon on: "Ai ingkon di bagasan las ni roha hamu borhat, jala di bagasan hadameon hamu pataruon."
Dua hata: Borhat di bagasan las ni roha jala di bagasan hadameon pataruon ni Debata. I ma Debata na patupahon sangkapNa. Las ni roha dohot hadameon do hata ni Debata nang tu pardosa.
Laho patuduhon dohot patoguhon i didok ma na dohot so angka dolok nang robean manomunomusan (ayat 12-13):
Parjolo, "Pangiaron ni angka dolok dohot robean soarana marolopolop di jolomuna; Paduahon, "Nasa hau di ladang martopaptopap tangan." Patoluhon, 'Singkat ni tadatada tubu ma sampinur, jala singkat ni latong tubu ma bunga na hushus; i ma bahen barita di goar ni Jahowa, bahen tanda salelenglelengna, na so olo hambar."
Jamitanta sadarion, i ma ndang apala manoarahon na parjolo sinangkin, i ma hinaringkot ni sipatupaon ni pardosa i, i ma pajonok diri tu Debata jala asa marhamubaon, alai manoarahon sangkap ni Debata na tumimbo sian i do - ala ditanda Ibana so hadirion ni hajolmaon na so apala tuk pamasa hamubaon ni roha di/sian dirina -, i ma manaruhon bangsoNa di bagasan las ni roha dohot hadameon, jala laho papos rohanasida disi dibahen do tanda ni angka hau, dolok dohot suansuanan na marlas ni roha di na ditaruhon Debata nasida mulak di bagasan las ni roha dohot hadameon. Ingkon saut do i. Ndang mulak hataNa i tu nasida.
Di pardalanan ni bangso i saut do i dibahen Debata Jahowa. Mulak do nasida sian Babel tu Juda dibaheb Jahowa
Mansai ringkot do i, i ma hasasaut ni hata ni Jahowa i botoon dohot auhonon ni angka naposoNa sipatarias hataNa i. Ringgas marbarita nauli tu angka naung agoan panghirimon di Debata partano batoanta i, tarlumobi di partingkianta nuaeng uju masa hamaolon na so taradopi hita isara porang, pandemi, hinaotik ni ulaon sialana, dohot marragam na ingkon taadopi.
Laho patangkashon i dipangke ma tudostudos na so mulak udan dohot ombun so jolo mampanghorhon jo tu tano inganan hatutuat ni udan nang ombun i, mambahen marparbue suansuanan i.
Nian ndang migor di ari di na dihatahon Debata hataNa i migar saut/masa hataNa i tu bangsoNa i.
Ala ni i do umbahen na tung ampit i gabe jamita tu hita na mangongku na Debata Jahowa do partanobatoanta, ala sangkapna na uli manaruhon mulak na tarbuang di bagasan las ni roha dohot hadameon i do hataNa tu hita jolma, tu hita bangsoNa di portibion, nang tu hita ruas nang pangula ni huria di Huria Kristen Batak Protestan.
Pangarimangrinangionta boi do na mangihut on:
Parjolo, ala mamangke tingki do hasasaut ni hataNa i, ringkot do hita benget jala marpos ni roha molo so migor taida hasasaut ni hataNa i.
Gariada nuaeng tu rakyat Ukraina ingkon mengungsi/paisolatnasida ala ni porang. Hita pe di ganup pardalanan ni ngolunta, ringkot do hita manghaposi Ibana na mamboat mulak hita di bagasan las ni roha sian angka hamaolon ni ngolu na taadopi. Marragam do hamaolon ni ngolunta be marsadasada, di angka gulmit ni pardalanan ni ngolunta i.
Denggan ma taida angka parungkilon dohot perjuangan ni dirinta, donganta, ruasta nang partohonanta mangulahon ulaonnasida dohot mandungdung sintasintanasida. Disi ma taamenhon hataNa i.
Paduahon, marhite angka naposoNa do dipaandar Debata Jahowa sangkap nauliNa manaruhon angka na tarbuang di tingkion tu na denggan sinangkapan ni Debata.
Mansai arga do di Jahowa angka naposoNa i patolhashon hataNa i. Ala songon i do hape pardalan dohot hasasaut ni hataNa i ingkon tangkas ma angka sipatolhas hataNa umboto dia do hataNa i marhite hataNa di Bibelta i tu hita dohot angka donganta na mangolu di tingki on. Ingkon tangkas dia hataNa i, na so mulak botinon i, alai na marhasahatan dohot marparbue i.
Patoluhon, ingkon hinsa jala hiras ma angka sipasahat hataNa i pasathonsa, jala ingkon pos rohaNa na mangula do hata ni Debata pinatolhasNa.
Margogo ma hita, Amen
(Penulis melayani di Pearaja sebagai Ephorus HKBP)
