Renungan Minggu Ephorus HKBP: Guruhon Nadenggan Pasohot Najat” (Jesaya 1: 18-20) -->

VIDEO

Renungan Minggu Ephorus HKBP: Guruhon Nadenggan Pasohot Najat” (Jesaya 1: 18-20)

Minggu, 30 Oktober 2022

Ephorus HKBP Pdt Dr Robinson Butarbutar

GREENBERITA.com- Hamuna angka Dongan,
Molo taparsiajari konteks ni parngoluan hajolmaon ni hajolmaon di partingkian ni panurirang Jesaya tu parngoluan ni hajolmaon di partingkianta nuaeng tarlumobi di tongatonga ni bangsonta Indonesia dung 22 taon dung reformasi tarlumobi di panguluhonon ni Presiden Joko Widodo songon pamarenta, tarlumobi domu tu ketidakadilan dohot hajahaton pinatupa na angka parhuaso dohot pengusaha tu angka rakyat na metmet, na so mardihadiha, angka na tading maetek dohot angka na mabalu, songon i nang maradophon angka kaum difable, boi dohonon ndang apala boi be padosonta. 

Pamarenta, pengusasaha dohot angka jolma marsahasahalak nunga bahatana na unduk tu angka paraturan na manjagai hademahon ni jolma nang hadengganan ni na tinompa na asing. Pasohot na jat, mangguruhon dohot patupa na denggan. 

Alai malo tatangkasi umbagas dohot jumamot secara okjektif, nang be secara umum ndang dihagigihon bahatan halak patupa na jat tu donganna jolma dohot tu angka na tinompa ni Debata na asing - ai angka uhum dohot penegak hukum nunga adong di tongatonga ni negara, propinsi, kabupaten, kota madya, kelurahan, desa nang dusun songon i nang perusahaan laho mamboan tu uhum angka na patupa hajahaton jala na mangalehon apresiasi manang penghargaan tu angka na patupa na denggan – isara nangkok jabatan, goar na denggan, dohot nang hadiah marrumangkon hepeng – alai tong do ndang maol idaon dohot goaronta torop ni halak na sai patupa hajahaton, isara korupsi – na didok Menko Politik Hukum dohot Ham Prof Mahfud tong lam bidang jala jago patupahonsa, ai isarana angka pribadi ni ruas ni DPR nunga patupa angka panghataion dohot angka na naeng situmpahan ni APBN andorang so ditotophon DPR dope APBN; isara hajahaton maradophon dakanak, parompuan, angka kaum difable, angka kaum transjender, angka sunge, angka tao, laut, nang udara. 

Gariada, songon na pinaandar ni Amang Aris Merdeka Sirait, Ketua Komnas HAM Dakdanak di ari 25 Oktober 2022 I, naung nangkok torop ni na patupa kekerasan tu angka Dakdanak di hutanta, Tano Batak; isara hajahaton pinatupa ni Presiden Putin tu rakyat Ukraina na mampanghorhon resesi ekonomi tarlumobi naeng masa di taon 2023; isara hasesega ni angka na tinompa ni Debata, lingkungan hidup, binahen ni angka perusahaan nang rakyat pe tahe na so manegai angka , na mambahen lam mohop portibion, lam jotjot masa angka aek godang na tompu, songon i nang halean potir bahat negara di Afrika; isara angka diskriminasi, rasisme, ketidakadilan sosial di tongatonga ni angka bangso na mampanghorhon ndang boi ro dame/shalom/hadumaon di angka negara i. 

Jala, na mambahen lungun roha i ma, sian angka na parsidohot patupa angka i adong bahat do na manggoari dirina halak Kristen, siihuthon Jesus, angka ruas ni huria ni Hakristenon.

Ala ni i, jamita sadarion na dienet sian Jesaya 1: 1-12 tung mansai ampit tu hita angka ruas ni HKBP na mangolu jala mangula di tongatonga ni masyarakat na so haru marsitutu dope mangguruhon na denggan jala na sai olo dope mamingkirmingkiri, tarunjun, jala mangulahi patupa na jahat. 

Na mangihut on ma tona ni hata ni Debata tu hita masirainrainan, na so tarsirang na sada sian na asing, na mamangke na ginoaranna ,teologi sebab-akibat,’ na tong ampit tu halak Kristen naung ditobus Tuhanta alai laos na tarjou mangolu di bagasan ngolu na imbaru:
Parjolo, tolu na mangihut on: (i) marburi, manguras, (ii) paholang diri sian jala (iii) pasohot diri mangulahon hajahaton (ayat 16 dohot 18). Di hita halak Kristen, diburi Tuhanta Jesus do hita marhite mudarnai asal ma porsea hita di Ibana dohot di ulaonNa manesa dosanta di hau pinorsilang i. 

Ndang tarbahen hita manguras dirinta sandiri, songon na dihaposi angka na so sapingkiran dohot hita di portibion. Alai ndang holan i. Ingkon sahat do tu na paholang dirinta sian pambahen na roa. Mansai ringkot do on, ala olo do pajagojagohon manang paburnangburnang diri hita mandok ndang ‘tartondong’ ni hajahaton i ahu. 
Immune do ahu. 

Siala ni gabe tapajonokjonok dirinta tu ulaon na jat. Laos gabe disi ma hita marlaok hajahaton. Napaduahon on ma tona tu na so tarsulandit dope, na manoarahon hinaringkot ni na paholang dirinta sian dosa. Alai tu angka naung sanga madabu tu ulaon hajahaton, gariada mangulahisa dijouhon ma asa tapasohot dirinta sian ulaon manjahati. Tu na patupahon na patoluhon i dibagabagahon Debata do hasesaan ni dosa na hibul (ayat 18). Di Hakristenon, tupa do i di bagasan ulaon ni Kristus na mamelehon diriNa humophop hita.

Paduahon, dung tapatupa natolu I masuk ma tu na patupa opat na mangihut on: 
(i) Guruhon mambahen na denggan, topik ni jamitanta. Mangguruhon ‘mambahen” na denggan ndang muraura, ingkon bonaanta sian uju di bortian dainang hita, jala sahat tu nang uju Lanjut Usia hita. Dison do porlu tolu na mangihut on: hagiotta dohot parsitutuonta sandiri; na di humaliangta, isara natorasta, alealenta, masyarakatta, uhumta, angka uluanta, penegak hukum. 

(ii) Ndang sai holan mangguruhon, alai ingkon sahat do tu na mangulahon. Mangulahon dia? I ma mangalului uhum na tigor, na denggan, pature na so denggan, pature na so uhum. Dison do ringkot ulaon ni angka sibahen uhum, angka anggota Dewan, di tirket nasional, propinsi dohot kabupaten. I do ulaon ni angka anggota Dewan laho patupa uhum na tigor, tarlumobi tu angka na sopot so marama, dohot angka na mabalu; ulaon ni penegak uhum do tong patupa na tinotophon ni angka anggota Dewan, isara polisi manjalo alualu ni rakyat, jaksa na mamboan tu pengadilan, jala hakim na manimbangi jala manotophon uhum tu na patupa na jat, patupa na jat tu angka na gale. 

(iii) Mamintori n ani rupa, angka na ditindas. Mangguruhon dohot patupa angka i, i do na pinangido ni Debata sian angka naung manguras dirina. 

Patoluhon, i ma dia do jambar, upa, panghorhon ni haradeon ni sasahalak patupa na tolu na di ginjang i nangkin, manguras, paholang dohot pasohot diri sian ulaon manjahati? Mansai tangkas do hata ni Debata sian panurirang Jesaya: Angka na ringgas tumangihon dohot mangoloi/mangihuthon na tolu i, mansai tonggi do panghorhonna di ngolunta, i ma: 
“Sai panganonmuna mdo hinadenggan ni gogo ni tano.” On ma hata di Debata tu bangsoNa na jolo nang nuaeng na mangolu di bagasan ulaon pertanian, na mangula di tano. Denggan panen. Ndang sega hauma. Ndang ditangko panangko parbue ni na niula. Ndang dipangan na di toru manang ndang dipangan angka gulok/ulat panegai suansuanana. Ndang hona sahit ni suansuanan. Pertanian do sada sian sumber ngolungolu na mansai ringkot di hajolmaon. Di angka dalan ni ngolungolu di partingkianta nuaeng, ndang holan pertanian be. Marragam, na boi dapotta sian tano na di toru ni tano termasuk tambang na marragam i, isara batubara, mas, berlian, dna, sian aek, sian laut, sian mata ni ari, dohot angka na marragam i. 

Sudena gabe dalan ngolu na mambahen mardohar, sejahtera, maduma hajolmaon i marsundutsundut molo ndang tapatupa hajahaton, baliksa manguras hita, tapaholang dirinta sian jala tapasohot manjahati tu donganta jolma nang tu angka na tinompaNa na asingna i.

Alai molo manjua hita jala mangalo hat ani Debata pinatolhas ni panurirang Jesaya i tu hita di partingkianta nuaeng, panganon ni podang ma hita. 

Nidokna, masa ma angka konflik, porang na metmet sahat tu na balga. I do na tarida panghorhon ni angka hajahaton na masa parpudi on di portibion, isara porang pinamasa ni Presiden Putin maradophon Ukraina. 

Gabe bangsona sandiri pe, i ma angka sordadu nang ekeonominasida, gabe manaon. Marribu na monding sordadu ni Russia di parporangan di Ukraine. Bahat rakyat Russia di angka hutahuta na manaon. Angka bangso di portibion pe, tarlumobi na pogos, bahat na manaon. Maminjam be nama angka bangso tu IMF na papinjamhon hepengna dohot sayarat na mansai maol gohan ni paminjam. 

Jala, songon nidok ni Presidenta Jokowi di partingkian parpudi on, mangadopi taon na golap, lapatanna resesi ekonomi, ma portibion di ariari na ro on. 

Ala ni i angka dongan, topik ni jamitanta, marguru ma hita patupa na denggan, jala tapsohot ma mangulahon na jat marhite na patupa uhum tu angka na metmet, angka na digosagosa, angka na dirupa, angka napogos, angka na sopot so marama so marina, asa tarpasupasu ngolunta marsasahalak, marsabagas, sahuta, sabangso dohot portibion, amen.


( Jamita Minggu XX Dung Trinitatis Jamita Evangelium, ginurithon ni Pdt Dr Robinson Butarbutar, Ephorus HKBP )

Loading...