Ginurithon ni Pdt. Dr. Robinson Butarbutar, Ephorus HKBP
“Haporseaonmi do Ma Paluahon ho”(Mateus 9: 18-26)
Hamu angka Dongan hinaholongan di bagasan goar ni Tuhanta Jesus, Sipaluai.,
Nantoari, pukul 14.29 ditelepon Praeses Winner Sitorus do ahu. Tingki i di ruang tunggu ni Airport D3 ni Cengkareng do ahu. Disungkunnasida di dia ahu, jala songon dia kondisingku, hipas manang ndang. Hupaboa ma tu Praeses i na hipas do ahu, jala tongon di airport, paima dijou nangkok pesawat.
Pukul 14.30 hian pesawat sinangkohanki borhat. Alai ndang dijou dope, ala tarlambat 30 minut ma hami. Ala ndang dijou dope, mondokondok ma simalolongku, ndang huboto.
Di na hehe ahu, huida nunga moru godang angka panompang na ingkon sapesawat dohot ahu. Laos hugebe ma joujou sian Informasi ni airport, manjou goarhu asa masuk ma ahu tu pesawat, ai nunga naeng tutup pesawat ni pesawat nami. Migor marlojong ma ahu tu pesawat. Sanga dope ahu masuk.
Dung hundul ahu nang angka panompang na asing ni pesawat Batik Air ID 6840 i, hupaimahami ma asa borhat nian. Alai dung sadia leleng, ro ma pilot mandok tu hami, na tongon dipature teknisi do adong kerusakan ni masin pesawat, jala siala ni ni asa sabar ma hami paimahon. Minta maaf nasida. Alai dung leleng, ndang marna adong barita. Mulai ma mohop huhilalahami, ai uju so pesawat ndang dipangolu dope AC na timbo. Ala dung mohop dihilala panumpang, ro ma adong sahalak panompang tar opat korsi jarakna sian kursi na huhunduli, manungkun dohot soara na timbo andigan ma hita borhat. Gabe dohot ma na asing manghilala na ingkon manungkunhon na dos.
Dialusi Pramugari do asa sabar, ai nunga denggan be masin ni pesawat i, paima giliran borhatnama muse, ai sanga nunga salpu giliran habang na parjolo. Alai ndang olo manangihon panumpang naung sanga jonjong i. Haruar ma hami. Ndang olo hami mate annon di ginjang uju habang pesawatta on.
Dung disungkun Pramugari pilot i, gabe didok uluan ni pramugari i ma tu hami hata na mangihut on: “Hamu angka dongan. Borhat do hita. Nunga denggan be masin i dipature, jala nunga diloas na berwenang hita borhat. Alai jolo tapaima ma giliranta. Hundul ma hamuna. Tapaima ma satongkinnari. Uju i nunga pukul 17.00. Nunga adong na martelpon tu keluargana be paboahon na sundat borhat i. Dung dibege angka naung hehe i hata ni pramugari i, tong ma dipangido nasida asa diloas nasida ruar sian pesawat. Dibungka pramugari i ma pintu ni pesawat i. Dung i dua partolu panompang marruaran ma.
Hupingkiri ma ulaonta sadarion. Molo dohot ahu tuat, adong dope ulaning pesawat na asing sinangkohaku. Husungkun ma Sekretaris Khusus Ephorus, Pdt Janrio Siagian, asa diida jo pesawat na asing, atik tung gabe sundat ahu marpesawat Batik on. Dialusi ibana ma dung diida pesawat na adong dope, holan sadanari nama penerbangan sadari i, i ma City Link, alai pkl 19.20 ma borhat. Gabe hetongetong ma tingki. Molo i hunangkohi, ba pukul 22.00 ma ahu sahat di Medan, Kualanamo. Sian i mardalan darat ma tu Aek Kanopan. Sahat ma pukul 03.00 manang pukul 04.00 sadarion.
Hape marningot bahat ni ulaonta sadarion, ba ndang tarbahen ni pamatangniba ra mangulahon ulaon parjamitaon, pesta dohot pangulosion sadarion. Alai molo pinaima borhat pesawat Batik Air on, so tung tong ndang marnaborhat dope. Beha ma?
Dohot ma ahu ruar, dung i manuhor tiket City Link i? Hupingkiri ma muse Keselamatan ni penerbangan dohot Batik Air i, aman do manang ndang.
Gabe hupingkiri ma na umbalga. Laho mangido pandapot, hutelpon ma sahalak Sintua, beha do, dia ma na pinillit? Sintua i mandok, Tangiang ni Ompu i ma. I do ate, ningku. Dung i hutelpon ma Inang. Ibana ndang apala dilehon pingkiran, ala tongon di pesta dope ibana. Ho ma Amang, ninna.
Dung i, hupaboa ma tu group pimpinan ni HKBP, mangido tangiang, ala 3 jom delay pesawat na hunangkohi, jala adong kerusakan masin. Godang panompang naung tuat. Sada uluanta, i ma Pdt Harahap, Kadep Marturia migor mangalusi, nauli Ephorusnami. Hutangiangkon hami pe. Ala hupaboa naung adong na haruar, ro ma Kadepta i manggurithon, somalna, Ephorusnami, ndang olo pilot manghabangkon pesawat ia so hipas pesawat i jala ia so pos rohana na aman do i.
Ala ni i, hupatedek ma tangangku, martangiang. Hudok ma tu Tuhanta i ramoti ma hami Tuhan. Hupasahat ma pardalanannami tu Ho. Laho mangula ulaonMu di tongatonga ni huriam di Aek Kanopan do ahu marsogot. Amen.
Dung i hupaboa ma tu Inang na rap dohot pesawat Batik Air ma ahu nuaeng, jala dung didok pilot asa ditutup pramugari ma pintu ni pesawat, asa borhat hami. Dialusi Inang ma di WA-na, didongani Debata ma ho Amang, ninna.
Dung mamungka meret pesawat nami, huingot ma na ingkon paradeonku jamita tu sadarion, Mateus 9: 18-26, naung hujahajaha uju paimahon pesawat di ruang tunggu. Huingot ma topik ni jamitanta, “Haporseaonmi do na paluahon ho,’ i ma hata ni Tuhanta Jesus tu sada Ina, na so digoari goarna, alai na dipaboa sahitna, na maniop rambu-rambu ni pahean ni Jesus na tongon mardalan sian sada huta tu huta na asing, jala na dijama ulosna uju manghatai Jesus dohot angka sibotosurat.
Malum ibana sian sahitna ala, songon nidok ni Jesus tu ibana dung malum, “Haporseaonmi do inang na paluahon ho.’
Mabiar do ahu andorang so huputushon nabodari asa habang rap dohot Batik Air i ma ahu. Di na martangiang i ahu, hupasahat tu Tuhanta, i ma na paluahon ahu sian biar laho habang. Pinuji Debata, ala sahat do hami di Kualanamo Airport nabodari pukul 20.20.
Haporseaonki palua ahu sian biar. Alai umbagas sian i hata ni Tuhanta tu sahalak ina na marsahit jala naung manjama ramburambu ni pahean ni Tuhanta Jesus di bagasan haporseaon na tarbahen Tuhan Jesus do paluahon ibana sian sahit naung tinaonna saleleng 12 taon: “Haporseaonmi do na paluahon ho,” i ma sian sahit na tinaonna saleleng 12 taon, na so tarpamalum ni angka pangubati uju i di abad parjolo. Haporseaon di Tuhan Jesus.
Hamu angka dongan, haporseaon di huaso ni Debata na tuk patupa angka ulaonNa mangurupi hajolmaon mangadopi angka tantangan, mandungdung na pinarsintana, patupa angka sipatupaonna di ngolu on, mansai bagas do ditiop angka na porsea di haadongon dohot ulaon ni Debata, isara pamalum angka sahit so ingkon marhite angka ubat, alai dohot do pamalum na marsahit mardonganhon/rap dohot ubat na binoto ni jolma i, i ma ubat angka na dijumpangi jolma i uju na robi sahat tu nuaeng di partingkian pangubation post-modern, sahat tu pangubation na tongon dilului pande bisuk pangubation ni sahit na so taboto dope nuaeng on, isara angka sahit kanker.
Sian tingki tu tingki, uju so apala timbo dope parbinotoan pangubation ni hajolmaon nang angka na tinompa ni Debata na asing i, sahat tu dung timbo parbinotoan i, sai adong do ganggu ni roha ni jolma di hatauon dohot hagogon ni Debata pamalum angka sahit na ro tu pamatang ni hajolmaon on. Ganggu ni roha i sai adong. Gariada sampe tu adong na so porsea be di hatauon ni huaso ni Debata patupa hamalumon i.
Beha do hamuna angka dongan, marsadasada? Dia do tonamuna tu dirimuna, tu dongan saripemuna, tu ianakkonmuna, tu pahompumuna, tu alealemuna, tu donganmuna sasektor huria, tu hita sahuria? Boi dope jangkononmuna haporseaon ni panurat ni evangelium Mateus i, na dung dibege ibana na pinasahat ni angka sisean ni Jesus na marnida dohot na marbarita taringot tu na masa tu parompuan na marsahit 12 taon i jala hata nidokNa tu ibana na haporseaonna di Jesus do na paluahon ibana?
Ganup tingki, ganup taadopi tantangan i, ganup tataon sahit na marragam i di ngolunta on jala taahirim hamamalum ni sahitta, mansai denggan do molo taingot ni pinatupa ni parompuan i na manjama ramburambu ni pahean ni Jesus i na pinatupana siala porsea ibana di Tuhan Jesus na tuk patupasa, jala haporseaonna i do na palua ibana.
Ahu i do na hutiop, uju tapatupa songon HKBP na tarbahen Tuhanta Jesus do palua HKBP sian utangna na mansai arga tu dana pensiun ni angka partohononna. Haporseaon i do na ditiop ruas ni Sinode Godang HKBP di Oktober 2022 na salpu i di na laho manotophon asa mamungka 1 Januari 2023 na salpu i tapatupa ma haputusan naung tinotophon ni parsinode di Sinode Godang HKBP di taon 1970 na salpu, i ma asa tapahinsat ma panghobasion di HKBP jala tapadenggan ma panarihononta di na ringkot tu ulaon ni HKBP, i ma balanjo ni angka partohonan, dohot angka na ringkot tu operasional nang program ni HKBP di Resort, Distrik nang huria, marhite angka peleanta, i ma 55 persen sian pelean i tapasahat tu sandok HKBP marhite Sentral, jala 45 persen ma hot di huria laho manarihon na ringkot tu ulaon di huria.
Dipasupasu Debata do pesepese Sentralisasi Parbalanjoon i mamungka Januari 2023 i. Nunga marbalanjo si 3618 personel ni HKBP sahat tu bulan lima i. Bonaanta ma nanget manggarar biaya operasional ni resort, distrik nang hatopan. Haporseaonta tu huaso ni Jesus Kristus mamasumasu hita sude ruasna i do na adong di hita HKBP, jala sian pasupasuNa tu hita i do tapasahat peleanta tu Debata laho pararat harajaonNa di huriaNa dohot di portibion.
Haporseaon di hagogon ni Tuhanta Jesus i ma tong na tatiop di na rap hita sandok bangso Indonesia mangulahon angka siulaonta songon sada bangso asa sahat hita di taon 2045 gabe negara maju, negara na hagogoon ekonomina nomor 5 ia so 4 di sandok portibion, ala nunga denggan rap dohot Tuhanta hita mamangke angka pasupasuna na balga i tu bangsonta. Haporseaonta tu Ibana do pamonang hita mangadopi tantangan-tantangan na ingkon adopan ni bangsonta sahat tusi.
Haporseaonta tu Ibana i do na manjagai hita angka ruas ni Huria Kristen Batak Protestan mangadopi tantangan na taadopi di ngolunta marsadasada, marsasaripe dohot marsasahuria, nang tantangan na ingkon adopanta padalan ngolu parhuriaonta, nang ulaon ni hurianta. Haporseaon di Tuhanta Jesus i do na manosoi dohot manogihon hita laho pasahat pelean na denggan tu Debata asa tuk tapangke tu ulaonNa di, marhite dohot sian tongatonga ni HKBP di portibion.
Haporseaon di huaso ni Tuhanta Jesus i do tong na palua hita di na mangadopi tantangan songon keluarga di na laho pasikkola ianakkonta satimbotimbona, di na mangalului dohot pahembang ulaon asa boi hita mangolu denggan, asa boi hita mamungka/patupa ulaon dohot pahembanghonsa, huhut palua hita sian parmaraan di ngolu nang di ulaon, pamalum sahit ni pamatang nang ulaonta di partibingkian na hatop mubauba, na mangharingkothon hatauon mamarsiajari situasi na adong, jala mangula saurdot tu situasi i, unang talu hita, unang gabe mate angka ulaonta, baliksa gabe marherbang, boi gabe pasupasu hita tu donganta jolma.
Sungkunsungkun di hita nuaeng: Hea do hita ganggu marhaporseaon di Tuhanta Jesus di bagasan pardalanan ni ngolunta?
Hot dope porsea hita? Taida do hasintongan ni hataNa i di ngolunta? Ahu nunga huida. Huelek ma hamu asa dohot nang hamu hot porsea di Ibana. Amen.
(Renungan dan kesaksian pribadi Ephorus HKBP Pdt Dr Robinson Butarbutar, MTh)
