Oleh Pdt Vivo Hutajulu, STh
GREENBERITA.com- Hamu angka Dongan hinaholongan, taparade ma roha dohot pingkiranta tumangihon sian Hata ni Tuhan na marSaringar sian Kolosse 3:1-4 : RAPHON JESUS DIPAHEHE”.
Pesta Paningotan Haheheon ni Tuhan Jesus paingothon huriaNa; raphon Jesus do dipahehe Debata angka na porsea dohot na naeng porsea dope. Hamatean parhitean laho manopot Jesuski! Ndang margogo sorop ni hamatean, Angka naung pinahehe ni Debata.
Mangalului angka na di ginjang ima arta banuaginjang i. Molo nunga dipahehe dohot Kristus; ndang di portibion be Ibana, nunga mian di banua ginjang, ima inganan ni angka na porsea i. Satongkin hita mangolu di portibion, alai ndang parmiananta tano on, surgo I do na hot tongtong. Banua ginjang do sambulonta, sian I do tapaimaima Sipangolu hita, Tuhan Jesus Kristus I (Pil.3:20).
Naung pinahehe ni Debata ingkon dungo haporseaonna mangulahon angka ulaon na denggan laho padaohon roha na so denggan. Di na patar Kristus I patar ma nang hita raphon Ibana di bagasan hasangapon
Hehe tu ngolu na imbaru. Nunga dipahehe Debata hita raphon Kristus sian hamateanta be. Alani ringkot paimbaru diri, paimbaru motivasi, parsaoran, panghobasion, dohot haporseaon. Holong ni roha ni Debata gabe ojahanna.
(Penulis saat ini melayani di Gereja HKBP Bolon Pangururan, Samosir)
