Renungan Minggu Ephorus HKBP: 'Na ro ma Ari ni Tuhan i' (Maleakhi 3:19) -->

VIDEO

Renungan Minggu Ephorus HKBP: 'Na ro ma Ari ni Tuhan i' (Maleakhi 3:19)

Minggu, 13 November 2022

Ephorus HKBP Pdt Dr. Robin Butarbutar bersama Istri tercinta

 Oleh Pdt. Dr. Robinson Butarbutar

GREENBERITA.com- Hamu angka Dongan sahaporseaon di bagasan Jesus Kristus Tuhanta i.

Di tongatonga ni angka parugamo, songon i nang di tongatonga ni Hakristenon na mahembang sian haporseaon ni Ugamo Israel na tumua nang na modern, sian bona sahat tu nuaeng dihaporseai jala diajarhon do na adong do ari parpudi di ngolu ni hajolmaon. 

Di Bibelta i, di padan narobi dohot di padan naimbaru, dihatahon Debata do marhite angka panurirangNa taringot tusi. Ndang mulakulak ngolu ni sasahalak dung mate sahat tu ro ajal ni hasiangan on. Alai sahali do monding. 

Dung i di ari parpudi paheheon ni Debata do angka na monding i. Digoari do i dohot ‘Ari ni Tuhan i,’ i ma ari na pinillitNa, ari na pinamasaNa, di tingki na naeng ro. 

Asa, ganup jolma ingkon mandalanhon ngolu na pinasahat ni Debata tu ibana sadenggandengganna saurdot tu na hinalomohon ni Debata. Molo dihangoluhon ibana do ngolu na denggan, i ma patupa angka na dihalomohon Debata, ba idaonna do panghorhonna di ngoluna di ariari na ro uju mangolu dope ibana di portibion, nang dung mate ibana. 

Molo ndang denggan ibana mandalanhon ngoluna, i ma diula ibana na so denggan, na jat maradophon donganna jolma dohot angka na ditompa na asing dohot maradophon Sitompa ibana i, ba di ari/ariari na ro idaonna do ulaon ni Debata na manguhum ibana. 

Ala ni i, tadok do songon angka na porsea di haadongon dohot ulaon ni Debata na ia jolma i, na tinompa ni Debata tudos tumiru rupaNa i, makhluk moral do, ndang holan jolma na marpamatang, dung i monding boti, alai jolma moral do, na mandalanhon ngoluna saurdot tu rupa ni Debata do manang ndang. Isi ni roha, hata nang ulaonNa ndang malua sian panatapan ni Debata. Ganup jolma i paadopadop dohot Debata na manompa Ibana. 

Ganup jolma i bertanggung jawab secara moral tu Debata. Molo diula ibana na so denggan ndang so boti Debata, hira lomolomo ni jolma i songon dia ibana mandalanhon ngoluna. Ndang. Alai mangula do Debata paingothon ngoluna asa muba. Molo ndang muba, di sada ari manang tingki uju di ngolu ni jolma i di portibion dope nang dung monding ibana muse, adong do sada ari di Debata paadopadop dohot ibana, manguhum ibana molo diula hajahaton, alai mamasumasu ibana molo diula na denggan saurdot tu hataNa dohot lomo ni rohaNa naung pinasahatNa tu si Musa dohot na niajarhon ni Anak ni Debata, Jesus Kristus Sipalua i.

Di minggunta sadarion, ndang apala taringot tu 'ari sogot' i, i ma andigan ma i jolo songon dia ma parsahat ni ari i -- songon na somal na gabe jamita di Hakristenon/HKBP, jala jamita tuson dienet jotjot sian buku panurirang Yehezkiel manang Daniel di Padan Narobi manang sian evangelium nang angka surat na di Padan Naimbaru, na impolana mandok ndang guru di hita jolma sadiharina, alai saguru di Debata do -- alai taringot tu aha do dipatupa Debata tu angka na mangulahon hajahatan di - jala uju di ngoluna di portibion, jala aha patupaon ni Debata di angka na mangulahon lomo ni rohaNa, hataNa, na pinasahatNa marhite si Musa dohot marhite AnakNa Jesus Kristus.

Jala, di buku panurirang Maleakhi i, dipillit Debata manariashon tu angka na porsea di Ibana sian najolo sahat tu nuaeng taringot tu aha sipatupaonNa di 'Ari ni Tuhan i' laho mangalo angka na mandok ndang apala adong pertanggung jawaban ni jolma i tu Debata taringot tu songon dia ibana mandalanhon ngoluna. Molo na jat diula ibana. Ba ndang pola beha i. Ndang adong na laho bahenon ni Debata tu ibana, tu Debata na palumehon ngolu tu jolma i. So do Debata. 

PasombuonNa do jolma i. Gariada, lam mardohar do ngolu ni na mangulahon na jahat (ayat 13-15). Angka na mandok porsea do dirina tu Debata dohot na so porsea di Debata songon i do panghantindanghonon:

 a. Laho mangalo i ma disoarahon marhite panurirang Maleakhi na so sintong songon i di Debata. Ndang songon i (ayat 16-21). Baliksa do.

Tu angka sihabiari dohot sioloi Jahowa jala na mangulahon lomo ni rohaNa (=partigor, na daulat) dohot angka na pasangap Jahowa marhite ngolu nang ulaonna/nasida dipatupa Debata do na saurdot tusi tu nasida di 'Ari ni Tuhan i' i ma: Parjolo, ditatap Jahowa nasida jala ditangihon, jala goar nasida tarsurat di adopan ni Jahowa (ayat 16 b). 

 Paduahon , Jahowa nampuna nasida huhut dijagai asa hot nasida, ndang mago (ayat 17). 

Patoluhon  , marhasurungan do nasida bahenon ni Jahowa sian halak parjahat. Ndang baliksa parjahat i na marhasurungan sian partigor (ayat 18). 

 Paopathon , di tongatonga nasida binsar do mata ni ari ni hatigoran mardongan hahisaron di linggoman ni habong ni Debata, marhuaso nasida maradophon angka halak parjahat (ayat 20-21).
Alai tu angka na jungkat dohot siulahon hajahaton songon on ma siadopan/masa tu nasida di 'Ari ni Tuhan i':  Taruhum nasida dohot uhum na sian Debata na digombarhon songon on: 'Marsijembur ma nasida' jala ala ni i ndang adong na tading (ayat 19). 

Taida sian duansa, dia na dipatupa Debata di 'Ari ni Tuhan i' dia na dipatupa, tu sioloi, sisomba dohot na marhabiaran tu Debata, dohot dia panatupaNa di ari na jat tangkas na gumodang do panorangion dibahen tu sioloi, sisomba dohot na marhabiaran tu Debata i, i ma: Ditatap Jahowa, dijagai, hot ndang mago nasida, marhasurungan sian angka parjahat, parnampunaon ni Debata, jala binsar hatigoran dohot hahisaron di nasida ai dilinggomi Debata nasida. Siala ni i do umbahen na gabe sahat tu na mangalehon poda panurirang i tu angka na mamillit ndang gabe parjahat, alai gabe partigor.

Dia ma poda i? I ma dua. Naparjolo, asa tapatupa ulaon paingotingothon patik ni si Musa dohot hata/patik ni Kristus i (ayat 22). 

Paduahon, laho paingotingothon i suruon ni Debata do tu tongatonga ni partigor i panurirang songon si Elias laho paulakhon roha ni dakdanak tu amana dohot ama tu ianakkonna unang ro Debata di 'Ari ni Tuhan i' na uju mangolu dope hita nang dung mate manghonahon hamagoon tu tano on (ayat 24).  I do ulaon ni angka naposo ni Debata di tongatonga ni Huria Kristen Batak Protestan (HKBP), i ma angka pandita na didongani Guru Huria, Bibelvrow, dohot Sintua di ulaon mamaritahon hata ni Debata, na dihatindangkon di bagasan Konfessi jala dipatorang di Agenda HKBP, mangulahon tolu ulaon ni Kristus i, i ma Panurirang, Raja, dohot Malim, jala songon singkat ni Kristus mangulahon ulaonNa di portibion. 

Songon panurirang paingothon angka ruas ni HKBP asa padao dirinta sian hajahaton, jala songon naung pinatigor ni Debata marhite Kristus marhangoluan ngolu na imbaru hita songon dalanta mandok mauliate patupa angka ulaon na denggan di bagasta, parsaoranta nang ulaonta be. 

Ala ni i, hamu angka Dongan, ala songon i ma bahat ni panorangion dibahen panurirang Maleakhi i laho mangondolhon hasurungan ni angka na tigor sian angka parjahat, mansai denggan do i ondolhononta di jamita sitangihononta sadarion, atik pe ndang boi hita lupa di jambar ni angka parjahat i, i ma uhumon ni Debata. Mansai ringkot do tapartondi i dia do na dipatupa Debata di 'Ari ni Tuhan i' tu hita angka na mandok mauliate jala mamujimuji Ibana siala ni asi ni rohaNa di ngolunta marhite na mangula na denggan. 

Sadasada na opat i mansai denggan tapabagas di jamitanta sadarion, jala poda na disoarahon panurirang i sipatupaonta asa hot di hita, manang dumenggan - songon HKBP hita mandok, asa tung tangkas naung diasii Debata hita di bagasan Jesus Kristus naung paluahon hita i: Parjolo, ditatap Jahowa do hita, jala ditangihon, jala goarta tarsurat di adopan ni Jahowa (ayat 16 b), ndang dao simalolongNa sian hita. Paduahon, Jahowa nampuna hita huhut dijagai asa hot hita, ndang salpu boti, ndang mago (ayat 17) alai hot nampunaNa. Patoluhon, marhasurungan do hita bahenon ni Jahowa sian halak parjahat. Ndang baliksa parjahat i na marhasurungan sian partigor (ayat 18). Mansai ringkot do haporseaon na songon i tapeop songon ruas ni bangsonta Indonesia di na tabangun Negara Indonesia na tahaholongi on gabe negara na maju, bangso na tigor jala na hisar menuju jala dung taon 2045. 

Paopathon, di tongatonga nasida binsar do mata ni ari ni hatigoran mardongan hahisaron di linggoman ni habong ni Debata, marhuaso nasida maradophon angka halak parjahat (ayat 20-21). I ma barita nauli siidaonta.  

Taajarhon ma i tu ruas ni hurianta, tu sundut naumposo, unang baliksa nasida gabe manadingkon Debata, gabe madabu jala mian di ulaon na jahat, tarlumobi di era Digitalisasi nuaeng. 

Laos tapaingot ma dirinta be molo sanga lomo rohanta patupa na jat na so diboto halak alai diboto Debata, jala tapaingot diri ni angka donganta di HKBP nang di duru ni HKBP, na adong do ari ni Tuhan i manguhum angka na jahat. Amen.


( Jamita Evangelium Minggu XXII Dung Trinitatis, penulis adalah Hamba Tuhan dan saat ini melayani sebagai Ephorus HKBP )

Loading...