Ibadah Hari Kenaikan Tuhan Yesus: “Gabe Sitindangi ni Kristus tu Sandok Portibion” -->

VIDEO

Ibadah Hari Kenaikan Tuhan Yesus: “Gabe Sitindangi ni Kristus tu Sandok Portibion”

Greenberita.com
Rabu, 25 Mei 2022


Oleh Pdt. Dr. Robinson Butarbutar


PEARAJA.GREENBERITA. com- Hamu angka Dongan hinaholongan, tabe ma di hamu dohot holong.


Martua do hita songon angka siihuthon Jesus ala di Bibelta i, tarlumobi di bagian Padan Naimbaru adong dua bagian na di bagasanna taboto adong tolu barita taringot tu ulaon ni Jesus Kristus dohot ulaon ni angka siihuthon Ibana.


Naparjolo, i ma taringot tu ulaon ni Jesus - halak Nasaret i, mamungka sian na dipasaut Debata sangkapNa palua hajolmaon marhite so di bortian ni si Maria dope Jesus sahat tu haheheonNa dohot parsuruanNa tu angka siseanNa, i ma na tarsurat di opatsa Evangelium i, Mateus - Johannes.


Napaduahon, i ma dia na ingkon patupaon ni angka siseanNa dung manaek Tuhan Jesus tu banua ginjang jala andorang so ro Ibana muse paduahalihon, i ma mamaritahon barita nauli sian huta ni halak Jahudi di Judea na maribukotahon Jerusalem, dung i sian i tu huta ni halak non-Jahudi, i ma Samaria sahat tu ujung ni portibion. I do na tarida di isi ni Ulaon Apostel. I do na niula ni angka halak Kristen na so sian punguan ni halak Jahudi, alai na gabe Kristen sian tongatonga ni halak Jahudi na mian dohot marharoroan sian tongatonga ni parserahan, na marhata Gorik, i ma si Stepanus, Pilippus, dung i si Saulus na dung muba margoar Paulus dohot angka donganna, na maboan barita nauli sahat tu kota Rom jala dung i tu Spanyol di Eropa Barat jala sian i muse tu sandok portibion sian abad tu abad.


Napatoluhon, i ma angka surat na digurithon ni angka apostel dohot na manggoari dirina naposo dohot apostel ni Jesus Kristus nang na so apala tangkas taboto ise nasida, na digurithon tu angka huria na jongjong dung dipatupa angka apostel padohot apostel na parpudi tubu, i ma Paulus, laho patoguhon haporseaon ni angka ruas ni huria i.


Jamitanta sadarion dienet sian bagian paduahon i, i ma alus ni Jesus Kristus naung hehe i sian na mate jala na mangarade manaek tu banua ginjang, tu pamingkirion nang pangidoan ni angka siseanNa asa mulak muse tu sangkap politis, nasionalistis dohot etnis ni angka siseanNa i naung diadopi Ibana nian uju mangula di Galilea dohot Judea dope Ibana, i ma ia haroroNa laho manggohi sangkap ni bangso Israel do, i ma paimbaruhon harajaon ni Israel na so haru digohi dope mamungka dung mulak nasida sian Habuangan Babel sahat tu partingkian pangarajaion ni Romawi na manindos nasida dokdok. Siala ni i gumodangan ia so sude panghirimon di haroro ni Mesias i dipadomu tu panghirimon haluan politis jala nasionalis. Songon i ma gogo ni panghirimon na songon i gabe nang angka sisean ni Jesus naung mangurupi uju di ulaonna di Palestina asa unang tusi panatapannasida taringot tu na tinuju ni ulaon ni Jesus ndang tarbahen malua sian i. I do na tarida di ayat 7-8 i. 


Tu na andul asing sian i do ditogihon Jesus Kristus naung hehe i roha dohot pingkiran ni angka sisean i. Ditulak Ibana pingkiran politis dohot nasionalis di ayat. Ditogihon tu ulaon manghatindangkon (Gorik: Martures), sian Jerusalem sahat tu ujung ni portibion. Jala i do niula ni angka apostel. Ndang be holan nasionalis, alai ingkon sahat tu universal (ayat 8).


Ala tona ni Jesus naung hehe na songon i do na tinonahon ni Jesus naung hehe jala naung manaek tu banua ginjang i umbahen sahat tu nuaeng, sahat tu haroro ni Jesus napadua halihon torus mardalan ulaon mamaritahun barita na uli taringot tu Jesus Kristus Sipalua i, i ma na so hot mamangke sada dalan alai hot dipaampit tu partingkian na mubauba. Najolo andorang so ro partingkian internetisasi ia hasahatan ni ulaon mamaritahon barita nauli mamangke cara geografis do, i ma meret sian sada inganan tu inganan na asing, sian sada huta tu huta na asing, sian sada kota tu kota na asing, sian sada negara/benua na sada tu na asing. Alai nuaeng di partingkian/era internetisasi nunga dohot mamangke metode/dalan sian sude arah tu sude arah, ndang be sian inganan na mora tu na pogos, alai nunga boi tong baliksa, patupa ulaon mamaritahon barita nauli sian tongatonga ni hapogoson. Tarpatupa i, siala ni hatop ni komunikasi nuaeng on. Na tangkas i ma, asal ma unduk siihuthon Jesus tu tona ni Jesus naung manaek i tarbahen ibana do mamaritahon goar ni Jesus Kristus na ganup pinggol na rade manangihon, tu ganup simalolong na boi marnida. Songon dia hita manghatahon dohot patuduhon barita taringot tu Jesus i pe tong do marasing jala marragam sian tingki tu tingki dohot sian dalan tu dalan, saurdot do pangantusionta taringot tu konteks ni ngolungolu hajolmaon na marragam jala mubauba i. Sibaritahononta, i ma hadirion, ulaon dohot pangajarion ni Jesus Kristus i dos do. Alai dalanta mamaritahonsa maragam do. Na dos, i ma haradeon mangulahon tona ni Jesus i.


“Gabe Sitindangi” tu sandok portibion i do dipangido Tuhanta Jesus tu hita ruas ni HKBP sahat tu nuaeng. Alai denggan do hita mangarimangrimangi i marhite na manungkunhon: Nunga taula i?

Molo ndang, dia sialana? Ra ala ndang masuk ulaon na ringkot be taida i. Ndang dope laho HKBP umbidang tu duru ni HKBP secara geografis dohot digital, di panindangion na hibul, i ma marhite pamaritaan di hata, ende dohot pambahenan. Sada sialana umbahen ndang bidang dope ulaon mamaritahon barita nauli tu duru ni HKBP i ma ala pasarihu hita tu na ringkot tu ulaon mamaritahon barita nauli na lokal. Ndang togu hita mendukung ulaon ni sentral (pusat) na boi mangulahon ulaon na umbidang sian holan na di lokal.  Ala ni i ma nunga tasangkapi padalan Sentralisasi Parhepengon ni HKBP, asa boi marhite sentral HKBP patupa parsuruon ni pangula tu duru ni HKBP na disarihon sandok HKBP marhite sentral. Tatangiangkon ma pasaut i marhite Sinode Godang 24-27 Oktober 2022 na manotophon padalanonta ma Sentralisasi Parhepengon mamungka di bulan Januari 2023 on.

Di tingki na dos, manang di dia pe ruas ni HKBP mangula dohot mangolu hot ma dipatupa ulaon panindangion i. 

Dipasupasu Tuhanta ma hita manghamauliatehon ala nunga sahat barita nauli i tu hita. Laos hita pe tauduti ma ulaon panindangion di goar ni Jesus Kristus i marhite hasadaanta nang marsadasada manang di dia pe hita maringan ala nunga tadai uli na manjangkon barita nauli i di ngolunta, Amen. 


(Penulis adalah Ephorus HKBP dan melayani di Pearaja Tarutung)

Loading...