Renungan Jumat Agung, “Diseahon Jesus do hosaNa” (Lukas 23: 44-48) -->

VIDEO

Renungan Jumat Agung, “Diseahon Jesus do hosaNa” (Lukas 23: 44-48)

angga sagala
Jumat, 02 April 2021

Oleh Pdt. Dr. Robinson Butarbutar, Ketua Rapat Pendeta HKBP


“Diseahon Jesus do hosaNa” (Lukas 23: 44-48)


GREENBERITA.com || Sian mamungka adong hajolmaon sahattu tingkion, ndang taretong be bahat ni jolma naung monding. Bahat sibonsirina jala marragam tong rumang ni hamamate na. Adong do i di  jolo ni angka nasolhot tu nanaeng mondingi, adong do tong ndang di jolo ni manangise; adong na di ida namarnida, adong nang na so marnidasa. Buni sian sihatoropan, buni sian dongan na jolma.  Tarlumobi ma di  partingkian Pandemi Covid 19 mamungka Feb 2020 i, di naung terinfeksi nuaeng torop halak, 129 juta halak, jala monding 2,8 halak, bortik do tupinggol ta barita taringot tu panghilalaan gok parungkilon niangka dongan ta jolma uju naeng monding nasida, ndang adong keluarga di hambirang na manang di siamun manang di jolona. Monding siala ni sahit Covid 19 i.


Di partingkian na songon i di sandok portibion, di ari parningotan di ari Hamamateni  Jesus Kristus Sipalua Hajolmaon sian dosa dohot hamatean marhite hamamate Nai,  dipaandar tuhita diana di bolus Ibana andorang so marujung ngolu di hau pinorsilangi dung  mana on linsing linsing dohot pastap pastap sian angka pardosa, halak Rom dohot sian halak Jahudi (ayat 46), jala dia na masa di humaliang naandorang so jala  dung marujung ngolu, monding Ibana, napatuduhon iaparmonding ni Jesus on ndang hamamate na so mampanghorhon, alai iahamamate Na on mampanghorhon do tuna marnidasa.


Parjolo ma taida di ana masa di humaliang na andorang so jala dung monding Ibana (ayat 44-45).Dung i taida ma parmate ni Jesus i sandiri. Andorang so monding Jesus Kristus adong dua na masa, na patuduhon ia natarsilang i ndang songon na tarsilang nasomal di Golgatha, alai  natarsilang na istimewa do.


Naparjoloi ma: Mangholom mataniari saleleng tolu jom, i ma pukul 12.00-15.00. Di sulingkiti angka na bisuk do halong angan dianamasa ujui, manangna lunar eclipse, gerhana bulan (i ma uju meret bulan tubayang bayang niportibi on), manang solar eclipse, gerhana matani ari(I ma uju sabagian portibi on di ondingi bulan na mangondingi mataniari ). Alai, dung ditangkasi NASA di map ni angka eclipse naung masa, hira so adong do na masa ujui di Judea. Di Antartica do na masa di partingkian ni hamamate ni Jesus i. Ndang tercatat ni map Eclipse i na masa di Judea i. Ala ni i, gabe tubu ma  panangkasion na mandok:  “Ulaon ni Debata do na pamasai, na so apala   unduk tu uhum alam natinompa na sandiri.” Asa,  adong tanda sian Debata na pinamasa na laho mandok diparateatehon Debata Jahowa do na masa i, dohot do ibana manghilala natinaon ni Jesus.  Ndang dipasombu Jahowa panaonon ni Jesus i. Mandongani Jesus namanaon i do Ibana. Tanda do itu Jesus najonok do Ibana tu Jesus natongon manaon i.


Napaduahon, maribak hira hira na di bagas joro, bola dua.  Diasuraon ni dok ni halongangan on? Ise mangaribaksa? Tontu ndang jolma. Alai Debata Pargogo Naso hatudosan i do. Taboto do tangkas nasahat tu ujui di tonga tongan i bangso Na Israel, ndang sude ruas na martangiang di  bagas joro masuk tu bagian ni bagas joro na holan malim boi namasuk tusi dohot Debata Nabadia i. Ala ni i,  marhite namangaribaksa uju manaon di hau pinorsilang anak Na Jesus i di dok Debata ma  namarhite panaonon ni Jesus nunga di pabungbung parsaoran dohot Debata Nabadia i, ai nunga disesa panaonon ni Jesus i dosa ni hajolmaon, pardosa.


Paduahon, dia ma na masa dung mate Jesus (Ayat 47-49)? Adong tolu na masa. Naparjolo, ruar hata ni uluan (Gorik: ekatontarches) na mamarsilangkon Jesus i jala na manjagasa. Dia ma i? I ma “Tutu do,  halak natigor/tigor roha halak on” (Gorik: hontos ho anthroposhoutos DIKAIOS).  Boi halak Rom  na mamarsilangkon Jesus jala na marnida songon dia Jesus mate mandok songoni. Natigor do na mate i.  Ndang pardosa. Ndang ala ni dosa na, alai ala ni hatigoran na do umbahen mate ibana. Di  joloni Debata dohot di jolo ni jolmana tigor do ibana. Napaduahon,  natorop marluhut jala masitompuk andorana marnida hamamasa hamamate ni Jesus, mandok ‘ala ni hami do on umbahen tarsilang dohot mate songoni Jesus. Napatoluhon, adong do sitindangi ni hamamate na i, i ma  saluhut namananda ibana nang angka parompuan na mangihut hon Jesus sian Galilea.


Nuaeng sahat ma hita tu na marnida songon dia parmateni Jesus dung masa solar/luna eclipsei,  na mambahen uluan nisordadu na mamarsilangkon ibana mandok natigor do Jesus,  jala na mambahe nmarluhut jala masitompuk andorana na torop i namangido huaso Rom mamarsilangkon Jesus,  duansa nasida bertanggung jawab di hamamate ni Jesus na pinorsilangkon nasida i?


Songon on tarsurat manggombarhon hamamate ni Jesus: Di bagasan soara nagogo (Gorik: phonesas phone megale) didok Jesus ma tu Amana: “Amang! Tu bagasan tangan Mu ma Hupasahat tonding Ku.” Dung pe disoarahon gogo songon i asa toshosa Na.  (Tarmarasing do evangelium Johannes manurathonsa, ndang adong soara nagogo i: “Dung dijalo Jesus asomi, ninna ma ‘nunga marujung,’  dung I dipatunduk ma ulu Na pasahathon tondi Na”, Joh 19: 30). Na mandok: Di  namangadopi panaonon bolon na tung dokdok situtu, ndang mandele manang mandate Jesus. Alai di bagasan pos ni  n i roha tu Debata dipasahat ibana tondi Na. Dung i pe asa tos hosana.


Ala ni i ma dipillit gabe topik ni Jamitanta, “Diseahon Jesus hosa Na”, laho pabotohon tu hita songon  on: “Na tigor do na mate i Jesus. Diseahon Ibana hosa Na laho pasaor hita dohot Debata,  laho manobus hita. Alai dohot do nidok na, ndang mandele, manang mandate Ibana mangadopi hamatean Na.


Dia do nidok na tuhi ta di partangiangan ta sadarion marningot hamamate Na dung marsoara na gogoi?


Parjolo, manghamauliatehon tu Debata, ai marhite hamamaten i Jesus natigor i boi hita saor dohot Debata, di patigor Jesus hita tu Debata.


Paduahon, ala songoni ma gogoni soara Na manjouhon tu Debata,  Amang!, denggan ma  unang tapansuasaehon hamamate Nai. Unang taparsilangkon Ibana paduahalihon Jesus  i marhite namanghalomohon dosa, manang lemba mambahen hita madabutu bagasan dosa. Unang  taulakhon mardosa.


Patoluhon, di tingki on marningot hamamaten i Jesus ndang ala nidosa Nai, ai na tigor do Ibana, patuduhontu hita di tingki Pandemi Covid 19 on, na dohot do Jesus  namarungkil mangadopi hamatean i manghilala parungkilon binolus niangka donganta namangadopi hamatean sialani  marragam tarlumobi siala Covid 19 i.


Paopathon, ala songoni do Jesus mangadopi hamatean, i ma marhite na pasahathon hosa Na tu Debata, hita pe angka si ihuthon Ibana, uju mangadopi parungkilon bolon ala mangulahon hatigoran,  gabe mangadopi hamatean hita, tapasahat ma tong tondinta tu Debata Ama i. Unang mate hita di bagasanpandelean, alai di bagasanhaporseaon ma hitamasuktuhamateani, ai diramotiDebataPargogoNasohatudosani do hitasahatro di salelengnilelengna. DipatauDebata ma hitamangauhonhataNa. Amen.

Loading...